Иона болн терүнә зуллһн

Деед Эзн Эврәннь Үгән хаадудт болн цуг келн улст күргхин төлә кезәнә онц кү шүүҗ авдг бәәсмн. Иим улсиг әәлдәчнр гиҗ нерәднә. Эдн Бурхна заквр күцәх зөвтә билә. Теднә негнь Иона гидг нертә әәлдәч.

Нег дәкҗ Бурхн терүнд өвәрц заквр өгч:

- Иона Ниневия балһс ор, Мини үг цәәлһҗ келҗ өг.

Түрүләд Иона хаҗһрар соңсв гиҗ медв. Ассирия орн-нутг тер цагт алдр болн күчтә билә. Ниневия - Ассирия орн-нутгин хамгин ик балһсн. Иим балһснд Бурхна үг келҗ болшго! Эн орн-нутгин улс нанар наад бәрәд болн цокҗ эс гиҗ алҗ чадх.

- Уга, - гиҗ Иона шиидв, - тер балһснур би төрүц одшгов.

Эн даалһвр күцәшгоһар, Бурхнас зулад, эн хәр һазрт оч бултхар шиидсмн. Тиигҗ санчкад, Иона керм олҗ авад, мөңгинь өгәд, дотрнь орад суув.

Түрүн өдр керм усчад, нег чигн юмн догшн аюлын тускар медүлҗәсмн уга. Зуг теңгсин дунд күрәд ирхлә, шүрүн салькн эклв. Теңгсин дольган улм икдәд, өөдән һарад бәәв. Теңсчнр чивҗ одн гиҗәхинь үзәд ик гидгәр әәцхәҗ. Күн болһн эврәннь бурхндан зальврв:

- Маднд нөкд болтн! Хәәрлҗ авртн! Бурхд, мадниг соңстн!

Болв теңгсин аюл улм догшрад бәәв. Иона болхла яһсмн? Эн әмд Бурхиг меднәлм. Тегәд эн бас Бурхндан зальврв? Уга, зальврсн уга, юңгад гихлә бийиннь тускар Бурхнд медүлхәр седсн уга. Иона кермин дотр орад унтв. Терүнүр кермин ахлач өөрдәд келнә:

- Бос, чамд Бурхн бәәхлә, Эврәннь Бурхндан зальврхнчн. Мадн чивҗәхинь, чи үзҗ бәәхшич?

Теңгсин догшн салькн, Иона бийнь болн терүнә зуллһн хоорндан залһлдата бәәсинь эн дотран ухалҗасмн. Болв Бурхтаһан Иона күүндхәр седсмн уга.

Кермин деер зогҗасн теңгсчнрин негнь догшн салькна шууган дотрас хәәкрв:

- Кенәс көлтә Бурхн мадниг иим догшн аюлар засглҗахинь медҗ авхин төлә җирв хайцхай.

Җирв Ионад тусна.

- Чи кембч? Чамаг ю кесндчн Бурхн маднла хамдан засгла харһулҗахмб? - гиҗ тедн Ионас сурцхаҗ. Иона иим хәрү өгв:

- Би теңгр, һазр болн теңгс үүдәсн әмд Бурхнд церглдв. Зуг ода би Терүнәс зулҗ йовнав. Юңгад гихлә, Бурхн намаг Нинеевия балһснур илгәлә. Зуг би эн балһснур йовхар седсн угав.

Теңгсчнр соңсчкад, эн күүнлә ю кехән медлго, тагчг зогсв.

- Намаг өргәд, теңгст хайтн. Нанас көлтә тиим ик һалв салькта аюл болҗана. - гиҗ Иона келв.

Теңсчнр иигҗ келсмн:

- Бидн чамаг ямаран күүһинь медҗәхшвидн. Болв чамла тиим юм кеҗ чадшговидн.

Зуг теднә арһнь тасрад бәәв, юңгад гихлә, һалв салькн улм догшрад бәәсмн. Тиихлә теңгсчнр Иона Бурхнд зальврад, буруһан сурад, Ионыг теңгсд хайна.

Тер дарунь догшн салькн тогтнҗ одна. Тедн үзсндән итклго, йир икәр әәһәд, өвдг деерән киисәд үнн Бурхнд зальврцхав.

Иона яһсмб? Эн чивҗ одв?

Эврәннь әәлдәчән Деед Эзн үкүлхәр седсмн биш. Ниневия балһснд Ионар Эврәннь үгән келүлхәр седсмн. Тегәд Бурхн ик тул заһс илгәв. Эн заһснд Бурхн Ионыг зальг гиҗ закв. Һурвн өдр, һурвн сө Иона заһсна гесн дотр билә. Иона болхла эн һурвн өдр, һурвн сө Деед Эзнд зальврсмн. Тегәд Деед Эзн хагсу һазр деер нульмад Ионаг һарһ гиҗ заһснд закв.

Теңгсин көвә деер Ионад иим ухан орв: «Бурхн ямр күчтә! Тер догшн һалв салькта аюлд болн теңгсин аңһудт закна. Тедн Терүнә келсинь соңсад күцәнә!»

Тегәд Иона босад, дарунь Ниневия балһснур йовв.