Савская хатн

Бурхна нерәр туурсн Соломон хаана тускар болн терүнә кецү сән тосхлтын тускар зәңг йир хол һазрт күрәд бәәв. Әмтн кецү сән бәәшнг хәләхәр болн Соломона цецн үг соңгсхар Иерусалим гидг балһснур һарад одв. Теднә дунд Савская гидг хатн билә.

Эн эврән йир байн билә. Соломон хаанд авч ирсн белгәрнь тернь медгдәд бәәв. Темәд йир үнтә каңкнсн үнртә тосар, алтн болн эрднь чолуһар ачсн ирдг билә. Дала мухлас эн зөөриг ут хаалһд манад йовдг бәәҗ.

Соломон эн медрлтә гиичиг йоста хаана авьясар тосв. Савская хатн терүнд олн зүсн сурвр өгәд болн энүнә зүркнднь хадһлҗ йовсн юман секәд тодрхаһар күүндвр кев. Соломон цуг энүнә сурвртнь хәрү өгв. Хаанд тер цәәлһҗ өгчәсн хәрүднь нег чигн меддго юмн уга билә.

Савская хатн терүнә цецн уханд иткәд, Соломона тосхсн гер үзәд, терүнә хот, мухланнь гер, зарцнрин хувц болн Бурхна бәәшңгд тәвдг шаталһна бәрц бәәрлһнь үзчкәд, эврәннь бахмҗан нуусн уга.

Энүнә седклнь невчкн бульглад келв:

- Тернь чик-чини цецн ухана тускар келснь, зуг өрәлнь болҗ һарв. Чини цецн ухан болн кергүд мини соңгснас даву болҗ һарв.

Деед Эзин нерн әрүн болтха! Чамаг хәәрлдг, Чамаг хан гисмн! Деед Эзн Эврәннь мөңк дурар Израилин әмтнд иигҗ кесмн!