Бурхна сүм

Деед Эзн Соломон хаанд заллтд әдс өгв. Цуг талдан өөр бәәсн әмтнлә эн орн-нутг амр-менд болн төвкнүн бәәдләр бәәҗ. Зуг Соломон Бурхна сүм тосххар бийдән ик керг кехщр бәәҗ.

Израилин әмтн Египетәс һарсна хөөн, дөрвн зун найн җил давад эн сүмиг экләд тосхҗ. Соломон эврәннь Давид эцкин Хирам гидг үүрлә-Тиирин болн Сидона хаанла-төвкнүн бәәлһнә бооца кевв. Эднә бооцаһар Хирам үнтә мод болн чолу авч ирх, Израиль болхла терүнднь - хот-хол авч ирх зөвтә. Бурхна сүм долан җилин туршарт тосхгдсмн. Давид өңгрхиннь өмн Соломонд өгсн күсләр эн сүм тосхгдв. Эн сүмиг Мориа гидг уул деер тосх һазр Давид бас зааҗ өгсн билә. Ик кезәнә тенд Авраам эврәннь үнн чикән Бурхнд иткүлсмн, Бурхн болхла Исаакин әм-җирһл аврсмн.

Сүм «Әрүн» болн «Бурхна Әрүн Сәкүснә» нертә хойр һоллгч әңгәс тогтдг билә. Бурхна хәәрцг бәәдг Әрүн Сәкүснә хора наадк хораһас невчк өөдән бәәдг билә. Әрүн Сәкүснә хораг салһҗ зузан хааһул өлгәтә билә.

Бурхна Әрүн Сәкүснә хорад терз уга, тер харңһу бәәх зөвтә билә. Библь терүг «Бурхнла күүнддг орм» гиҗ нерәднә, юңгад гихлә тенд күүнә нүднд үзгдлго Бурхн бәәнә.

Сүмин тосхлт төгсәчкәд, энүг байрин таалд әдслв. Сүмд Деед Эзнә хәәрцг орулхин төлә, Соломон цуг көгшдиг, ахлачнриг болн Израилин уңг-тохмин толһачнриг цуглулв. Бурхна гелңгүд Бурхна Әрүн хәәрцг хорад авч ирсн цагла, үүлн бууҗ ирәд, цуг сүмиг дүүргв.

Тиим кевәр Деед Эзн цуг кесиг таасад, болн Израилин келн улсин дунд бәәхән медүлв!

Бийиннь кесн тосхлт Деед Эзнд икәр таасгдсиг Соломон ода ирҗ лавта меддв.