Соломон цецн ухата күн

Хан Давид өңгрхиннь өмн Иерусалимд цуг израилин әмтнә толһачнриг цуглулад келв, Деед Эзнд сүм тосхх зура нанд билә. Давид икәр дәәллдәд бәәсн төләд, Деед Эзн терүнд сүм бәрх зөв өгсн уга.

- Мини көвүн Соломон Деед Эзнд сүм тосхх, - гиҗ Давид келв. - Кемр Соломон Бурхна зааврмуд күцәхлә, Деед Эзн нанд Соломон хан болхинь үг өглә.

Давид цуг әмтиг Деед Эзнә зааврмуд хадһлтн болн әрүн седкләсн Терүнд церглтн гиҗ заана. Цуг әмтнә толһачнр болн Давидин цуг көвүд шин хаанд Соломонд байрин андһар өгәд, терүнә һардвт орв.

Деед Бурхн Соломонд әдс өгв, эн хамгин күчтә хан болв. Эн цуг әмтнд дурта болн күндтә хан болсмн.

Шиңкән хан болсн цагтан Соломон әрүн седкләсн Деед Эзнд бәрц бәрв. Нег сө баһ наста хан Соломонд зүүднднь Деед Эзн ирәд келв:

- Чамд юн кергтә, Нанас сур.

Соломон келв:

- Чи мини эцкд түшг болҗ йовлач, терүнә хөөн намаг хан болҗ тәвүч, тегәд чамас сурҗанав: эврәннь зарцтан серл зүрк өгич; Чини әмтнд зарһ кехләрн сән мууһинь йилһхинь дасхич; иим олн чини әмтиг яһҗ толһалҗ чадхм?

Деед Эзн хәрүһинь иигҗ өгв:

- Чи зөөр болн ут нас бийдән сурсн угач, зуг чи Нанас цецн уха сурвч, тегәд Би чини сана күцәхв. Чини өмн бәәсн хаадудт болн хөөн ирх хаадудт уга бәәсн зөөр болн туурмҗ чамд өгнәв. Кемр Мини зәрлг болн мини зааврмуд чини эцк Давид кевтә хадһлхла, Би чини җирһл утдулхв.

Соломон серәд Деед Эзнд зүүднд орсн Бурхндан ханлтан өргв.

Нег дәкҗ хаанур зарһ бәрхәр бичкн көвүтә хойр күүкд күн ирв. Эднәс негнь келв:

- Ода хамдан нег герт бәәнәвидн, маднд нег цагла көвүд төрлә. Нег сө эн гергнә көвүн өңгрв. Би унтҗ бәәхлә, эн гергн эврәннь өңгрсн көвүнә ормд мини көвү авад сольв.

Хойрдгч күүкд күн келв:

- Уга, мини көвүн әмд, чини көвүн өңгрв.

Тегәд хаана өмн эн хойр күүкд күн зүтклдәд бәәнә.

Эн зүткәтә төр йир күнд болв, зуг цуг әмтн хаана шиидвр күләцхәв. Соломон зарцдан келв:

- Үлд авч ир, эн әмд көвуг хойр әңгләд эн хойр күүкд күнд өгтн.

Эднәс негнь хәәкрв, энүнә көвүн әмд бәәсмн.

- О, зерг мини! Эн көвүг әмдәр тер гергнд өгтн! Бичә алтн!

Талдан бәәсн гергн келв:

- Чамдчн болн нандчн уга болтха, әңглтн!

Эн хойр күүкд улсас кен экнь хан сәәнәр медв. Тер күүкд күн көвүһән әмдәр авв!

Цуг Израилин әмтн Соломониг йир икәр күндлдг болв, юңгад гихлә, эн әрүн чик йовдл һарһсн зәңгиг цуһар соңсв. Соломон әмтнә зарһ чикәр күцәхин төлә Бурхнас цецн-уха авч.