Давид болн Саул

Эн диилврин хөөн Давид хаана өөр үлдв. Эн терүнлә нег ширә һатц сууһад үдин хот уудг болв, Саул энүнлә күүндәд, зәрмдән нам селвг чигн сурдг билә. Цаг ирвәс Давид цергә зер-зев олзлдг дасад, зөвәр һавшун дәәч болад ирв. Баахн күүнә кесн, келсн хамгнь Саулд болн өөрк улстнь таасгддг болв, тегәд аштнь энүг хаана цергин толһачд тәвв. Зуг эн саамд Давидт Ионафанла үүрлснь бас кергтә болв, Саулын көвүнь энүнә сән үүрнь болв.

- Мини цергә хувц, мини үлд болн саадг ав, - гиҗ энүнд Ионафан Голиафиг диилснә дару келв. Эдн би чамла үүрлдгин темдгүд болтха.

Эн өдрәс авн Давид Ионафан хойр хоорндан итклтә өөрхн үүрмүд болв, үүрлдг эн йовдлан йир үндлг болв.

Олн әмтн Давидт бас дуран өгв. Залу улс, күүкд улс болн бичкдүд һаза харһхларн Саулас даву энүгәр бахмҗ кедг болв. Эннь хаана ур күргәд, эн үлү үздг болв.

Нег дәкҗ Саул Давидта ширә һатц суусн цагла, генткн хаана уурнь күрв. Давид шулун гидгәр көгҗмин зевсгән авад, Саулыг көгҗмин айсар тогтнулхар седв. Зуг эн саамд көгҗмин айс тус болсн уга. Давид Саулын уурллһна учрнь бәәсмн. Көгҗмин зевсгән бәрәд суусн көвүг үзн, эн бийән бәрҗ чадсн уга. Герин эрст түшүләтә җидән хан авн, бәәсн чидләрн энүгән Давидүр шивв. Зуг тернь саг бәәсмн. Эн үкс өкәһәд оркв, җид деегүрнь нисәд, шухтнсн әәтәһәр эрст шаагдв. Эннь улм икәр Саулын ур күргв. Эн хойрдгч җид авв, кемр Давид цәкллһнә һал мет эс хаҗисн болхла, эн терүг шаачкхмн билә.

- Дәкҗ Давидиг үзхәр седҗәхшв! - гиҗ хан хәәкрв. - Эндәс хол йовҗ филистимлянрта дәәллдтхә.

Деед Эзн Давидла бәәхиг үзәд, Саул әәҗ. Тегәд эн Давидиг бийәсн зааглв.

Зөвтә гих кергтә, Саул Голиафта бәрлдхин өмн өгсн үгдән күрв: энүнә күүкн Мелхола Давидин герин күн болв.

Тиим болвчн Давидт һарч зулх кергтә болв, юңгад гихлә Саул энүг көөх биш, алхар бәәнә гиҗ Ионафан зәңглв.