Каин Авель хойр

Эдемас көөгдснә хөөн Адам Ева хойр садын алднд бәәдг болв. Эднд хойр үрн һарсмн - Каин болн Авель. Эднә көдлмш йир күнд болдг бәәҗ, юңгад гихлә урднь эцкнь Адам бас иим күчр-күнд көдлмш кедг бәәҗ. Каин һазр эд-бод кедг билә. Авель болхла хө хәрүлдг бәәҗ.

Урднь Бурхн Эдем садт ирәд түрүн әмтнлә дуһарла. Ода болхла эдн тал ирдгән уурв. Бурхн хая-хая теднлә күүндҗ, теднә эрлһ соңсҗ зөвшәлән өгдг билә.

Нег дәкҗ Каин болн Авель Бурхнд тәклһн күргҗ өгх санл орна. Каин тәрә-темснәсн Бурхнд бәрц бәрв. Авель болхла, эврәннь хөөнәс түрүн хурһ алад, махна сәәнәсинь Бурхнд бәрц бәрв. Деед Эзн Авелин бәрциг таасв, Каина бәрцд оньган өгсн уга. Бурхнд ирҗәх күүг ямаран седклтә ирсинь Деед Эзн меднә. Каин һундлтаһар үлдҗ. Тер буру хәләһәд гейүрҗ. Терүнә чирә цәәҗ одҗ. Каин эврәннь дүүдән үлү үзҗ.

Бурхн терүгинь үзҗ келв: «Чи яһад һундвч? Сә кесн болхла, толһаһан деегшән өргдм бишви? Му юм кехлә, килнцчн үүднә ца күләһәд, чамаг авлхар седнә. Килнцд бичә авлгд». Зуг Каин килнцән диилҗ чадсн уга, тер дүүдән оньдин үлү үзәд бәәв. Авель Бурхнд дуран өглә, Каин болхла Бурхнд тиигҗ дуран өгсн уга. Каин һанцхн бийдән мел дурта болдлмн.

Авелин тускар санхларн Каин әвр гидгәр терүнд дурго болдмн. Тиигәд әәмшгтә юмн болҗ. Нег дәкҗ тедн хоюрн кеер йовсн цагт, Каин бийән бәрҗ чадлго дүүһән бәрҗ авад алчкв. Эн өдр түрүн болҗ үксн күүнә цусн һазр деер асхрв. Тиигәд тер Каин ик гидг килнц һарһсмн.

Удл уго Каин Бурхна ду соңсҗ:

- Чини дү Авель альдв?

- Медҗәхшв, - гиҗ ууртаһар Каин хәрү өгв, - би терүнд хөөч бишв.

Зуг Бурхн келҗ:

- Чини дүүһин цусн һазрас намаг дуудҗана. Ода чи харалла харһвч. Чи килнцд авлгдвч. Һазр деерәс чи туугдҗанач, чини һарар асхрсн Авелин цусиг бийдән ивтрәҗ авхин төлә һазр шуурч. Һазр деер чи хорһдх бәәрн уга, тенәд йовдг күн болхич.

Каин тер орман үлдәһәд һарч одв.

Тиигәд Адам Ева хойр эврәннь үрдән геев. Юңгад гихлә Каин теднәс холд йовҗ одв, Авель болхла үкв. Яһҗ эк эцкинь Авелин тускар зовҗ уульсн болхмн?! Болв тедн Каина хар санаһин туст улм икәр зовҗ уульсмн. Юңгад тедн эрлгд меклгдәд идҗ болшго модна темс идсмн? Кемр тедн тер темс эс иддсн болхла, эдн хөв-кишгән геешго билә. Эдн Бурхиг соңссн болхла Эдем садт Бурхтаһан күүндәд сәәхн җирһлән геешго бәәсмн. Болв Каин му, һә килнц кешго билә, Авель үкшго билә.

Хөөннь Каин гер авад, тер хойр үртә болв. Болв тер үрднь му догшн седклтә Бурхнд дурго болдг бәәҗ. Бурхна үг соңсдго билә. Бурхн Авелин ормд талдан үр өгв. Еваһас көвүн һарна. Терүндән Сиф гидг нер өгнә. Сиф Бурхнд итклтә болв. Сифин үрн Бурхнд дуран өглә.

Эн үрнәс Аврач ирх. Тиигәд һазр деер хойр үй тохм бәәв. Каина болн Сифин үрдд. Библьд Сифин күүкдиг Бурхна көвүд гиҗ нерәднә, Каина күүкдиг әмтнә көвүд гиҗ нерәднә.