Адамин килнцин тускар

Деед Эзн Бурхн теңгр үүдәв. Тер Бурхна Зарциг бас үүдәҗ. Тедн теңгр деер Бурхнд цергләд билә. Нег дәгҗ, негиннь Бурхнд дурго болад босад сөрлцҗ. Юңгад гихлә эврән әвр ик күчтә Бурхн болхар бәәҗ. Тер бослһнд дала Бурхна Зарцнр орлцҗ. Тегәд, Бурхн Теңгр деерәс тедниг шивәд харңһу там һазрт уңһаҗ. Унсн Бурхна Зарцна нернь эрлг, болв эн сөрлцсн толһач Бурхна Зарц билә. Кемрҗән Адам Ева хойр килнц кехлә, өңгрәд там һазрт орх. Терүгинь эрлг медлә. Эн цуг әмтнд дурго билә болн тедниг Бурхнла бичә үүрлтхә, бичә күүндтхә гиһәд хаһцулхар седлә. Эрлгд иим ухан орв: «Би эн хойриг садт бәәсн моднас темс идтн гиҗ келнәв». Теднд Бурхн сә мууһинь медүлдг модна темс бичә идтн гиҗ заавр өглә. Терүгинь эрлг медлә. Тер моһан дүрс авад Эдемин садур шурһад орҗ...

Нег дәкҗ Ева сә мууһинь медүлдг модна темснә өөр бәәхлә, ду соңсҗ:

- Ева!

Күүкд күн әәчкв: «Кен нанла дуһарчана?» Генткн эн бийиннь өөр моһа үзв.

- Бурхн таднд цуг модна темс бичә идтн гиҗ келснь үнн болх? - тер сурв.

- Уга, Бурхн тиигҗ келсн уга, - гиҗ Ева хәрү өгв. - Маднд садт бәәсн цуг модна темс идҗ болхмн, зуг эн моднас идҗ болшго. Тиигхлә мадн үкхивидн.

- Тадн төрүц үкшгот, - гиҗ моһа келв. - Бурхн тадниг бичә көндәтхә гиҗ келҗәнә. Кемр тадн энүг амсхла, тадн энүнәс дала юм медхит гиҗ Бурхн меднә. Тадн Бурхнла әдл болад болн му сәәниг йилһҗ чадхт.

Энүнә хөөн моһа уга болҗ одв. Ева цаарандан модна темс хәләһәд һәәхәд бәәв. Әвр амрар Бурхнла әдл болхит гиҗ соңссндан Еван ухан-седкл авлгдсмн. Эн арһул модна нег темс һарарн көндәв. Тас юмн болсн уга. Тегәд Ева модна темс амарн таслад зуув. Ева әмән алдҗ унсн уга! Темсн әвр әмтәхн бәәҗ. Эн кемлә Еваһур Адам өөрдҗ.

- Адам, чи бас амс, - гиҗ Ева келв. - Идҗ болшго темс би амсҗ үзүв болв би үксн угав, чи эврән үзҗәнч!

Адам удл уго бас темсәс амсв. Кен чигн үксн уга. Ода деерән. Болв нег юмн хүврсн болҗ медгдв, юңгад гихлә делкәд үкл ирв болн күүнә зүркнд һә, килнц орв. Килнц - эн Бурхна үг соңсдго юмн, Терүнә закан эвдлһн болҗана. Үкл - эн килнцнә заслһн. Иигәд күүнә кишг чилв. Тернь эрлгин күсл билә. Генткн Адам Ева хойр бийән нүцкн үзәд нег негнәсн ичв. Тедн ик хамтхас таслад бийдән хувц кеҗ. Тедн бийдән яһҗ нөкд болхм гиһәд ухалсмн, зуг тедн төвкнлт олсн уга. Түрүн әмтн ичәд бәәв. Теднд урднь медгдәд уга санан орв, һарһсн буруһан эдн медв.

Асхар Бурхн садур ирҗ. Адам болн Ева Бурхна йовдл соңсад таралңгна модн дунд бултҗ. Урднь Бурхн теднә Иньгн билә, зуг ода болхла Терүнәс эдн әәчкв. Килнцәс көлтә күүнә болн Бурхна сә-сәәхнәр бәәдг җирһл эвдҗ одв. Урднь тедн Бурхнд иткҗ эврә дурарн ирлә. Ода болхла Бурхнас бултх кергтә болв.

Бурхн өөрдҗ йовна. Тер чаңһар дуудв:

- Адам, альдвч?

Зуг Тер Адамиг олдҗ авшго гиҗ дуудсн уга. Юңгад гихлә Бурхн цугинь болн цугтаһинь үзнә. Адам болн Ева тедниг Бурхн хәәҗәхинь медтхә гиһәд Тер дуудла.

- Би энд бәәнәв! - гиҗ Адам хәрү өгв. Яһҗ һәргтәһәр Бурхнас бултхар седсән, эн Бурхнд хәрү өгхләрн медв. - Би Тана ду соңслав, болв нүцкн болсндан әәчкв.

- Нүцкн гиһәд кен чамд келв? - гиҗ Бурхн терүнәс сурв. - Ода күртл чи ичсн уга биләч. Идҗ болшго темс амсвч?

Адам Бурхн тал хәләҗ чадлго бәәв.

- Тана өгсн темсиг нанд мини гергн өглә, - гиҗ тер әрәхнәр келв.

- Юңгад чи тиим юм кеввч? - гиҗ Бурхн Еваһас сурв.

- Энтн моһа нанд дала юм өгхәр намаг меклв, - гиҗ бийән харсч Ева келв. - Би моһан үгд орв.

Тегәд Бурхн моһад келҗ:

- Тиим йовдл һарһсндчнь чамаг хараҗанав. Цуг оньдин әмтн чамд дәәсн болх. Болв нег дәкҗ Нег Аврач күн ирәд, чамаг диилх!

Адам Ева хойр Бурхн келсиг тас медсн уга. Юнгад гихлә тедн мууг диилхин төлә Бурхн Аврачиг илгәхиг медәд уга билә.

«Ода эдн му сәәниг йилһҗ меднә, - гиҗ Бурхн санв. - Әмтн Намаг дурахар седнә, болв теднә чидлнь тату, тедн мууһинь диилҗ чадшго. Тегәд Би җирһл-кишгин модна темсәс амсх зөвән теднд өгчәхшв».

- Тегәд тадн эн садас һарх зөвтәт, - гиҗ Бурхн Адам болн Евад келв. - Чамд, Ева күүкд бәәх, зуг, тедн һархларн чамд зовлң күргх. Чи Адам болхла, бийән болн өрк-бүлән теҗәхин төлә күчр-күнд көдлмш кехч. Чини тәрәнә һазр деер хатханчг болн буг өвс урһад бәәх, наснаннь туршарт чи эврәннь көлсән һарһҗ гесән теҗәхич. Цааранднь цогц-махмудчнь хәрү тооснд хүврх, юңгад гихлә чи һазрас һарлач.

Әмтн таралңгнас һархин өмн Бурхн теднд арсар хувц-хунр теткв. Әмтн Бурхиг соңслго, терүнлә хамдан бәәҗ чадлго бәәв чигн Бурхн теднә төлә арһинь хәәв. Тегәд, Адам Ева хойр таралңгас көөгдсмн. Бурхн Эдем садыг болн җирһлин модыг манхин төлә херувимудиг тәвв. Тер цагас авн әмтн сәәхн Эдем садын алднд бәәдг болв. Зуг... Бурхн теднд Аврачиг ирх гиһәд үгән өгв!