Иордан һол һатллһн

Өрүн эрт Иисус Навин Израилин әмтнлә Иордан тал һарад йовв. Һолын амнд күрәд зогсчкад, эдн һатллһнд белдв. Хамгин түрүнд әмтнд бийән цеврлх кергтә гиҗ деед Эзн Иисус цугтад келв, юңгад гихлә Деед Эзн өврмҗтә юм үзүлхәр бәәнә.

Маңһдуртнь Иисуст келв:

- Моисейд нөкд болснла әдләр, эндр Би чамд нөкд болхан әмтнд үзүлхв. Бурхна гелңгүдт кел, теднә көлнь Иордана уснд күрм цацу Бооцана хәәрциг бәрәд зогсцхаг.

Иисус Бурхна гелңгүдт Бооцана хәәрциг авад, әмтнә өмн йовтха гив. Әмтнд болхла Эн келв:

- Эн өдр Деед Эзнә өврмҗтә юм үзхит, тадн заагт әмд Бурхн бәәхиг медхит! Бооцана хәәрциг тана өмн йовад, Иордан һатлх. Уңг-тохм болһнас неҗәд кү автн. Тедн онц заквр авх! Деед Эзнә Бооцана хәәрциг авч йовх Бурхна гелңгүдин көлнь Иордана уснд орхла, усн хойр әңгрх: нег талнь эн хурад зогсх, эрс мет, наадк талкнь - һооҗх.

Бооцана хәәрциг авч йовсн Бурхна гелңгүд һолын уснд орхла, деерәс һооҗҗасн усн генткн зогсҗ одв! Усна урсхулын деед бийд, Бурхна гелңгүд зогсҗасн ормас ууҗмд, һолын усн ик өндр эрс мет зогсв. Наад талк уснь чилтлән һооҗв. Хоорнднь өргн хаалһ һарв, тегәд Бурхна гелңгүд Бооцана хәәрциг һолын тал дунд күртл күргв. Тендән эдн зогсв. Цуг израильтянр Бооцана хәәрцгин өөгүр хагсу һазрар Иордана наадк амнур һарв.

Израильтянрин уңг-тохм болһнас неҗәд залу (12 кү) Бурхна гелңгүд Бооцана хәәрциг зогсчасн ормас неҗәд чолу һолын йоралас авад, әмтн хонх һазрт күргтхә гиҗ, Деед Эзн заав. Талдан арвн хойр чолуһар Иисус Навин Бурхна гелңгүд Бооцана хәәрциг зогсчасн ормд, Иордана йоралд бумблв тәвүлв. Цуг әмтн Иордана наадк амнд һарсна дару Бурхна гелңгүд Деед Эзнә Бооцана хәәрциг авад һарцхав. Тедн Иорданас һарм цацу, һолын усн дүүрәд, урдх кевәрн хойр аман цокад гүүв. Әмтн эн Деед Эзнә өврмҗтә юмнд алң болад, Иерихон балһсна дор бийд, Галгала бәәрнд бәәршлв. Тенд Иосиф Навин арвн хойр залус һолас һарһсн арвн хойр чолу тәвүләд, әмтнд келв:

- Тана көвүд таднас, эцкнрәсн: «Эн юн гисн чолудв?» - тедндән келтн: «Иордана усн энд Деед Эзнә Бооцана хәәрцгин өмн хойр әңгрв». - гиҗ келтн. Эн чолуд Израильд мөңк бумблв болх, цуг нарт делкән әмтн медтхә, Деед Эзнә һар күчтә! Тадн Деед Эзнәс әәх зөвтәт. Тана Бурхнас, наснаннь сүл өдр күртл!