Раав болн туршулчнр

Моисей өңгрснә хөөн Иисус Навин Израилин әмтиг Бурхна өгнәв гисн һазр эзлҗ авхин төлә эклҗ белдв. Кемр Иисус Деед Эзнә сурһмҗд орад Энүнд церглхлә, Деед Эзн Иисуст нөкд болх болв.

- Чаңһ, залу-зөрмг бол, - гиҗ Деед Эзн келв. Чи альд йовв чигн, чини Деед Эзн чамта!

Тегәд Иисус әмтн һурвн хонга хаалһин хот белдтхә гиҗ заквр өгв, юңгад гихлә ода эдн Иордан һол һатлҗ йовх. Эн һазриг Бурхн эднд өгхәр үгән өгсмн, тегәд энүг Бурхна өгсн һазр гидг бәәҗ.

Иисус болһамҗта бәәсмн. Тер һазриг болн Иерихон балһсиг шинҗләд иртхә гиһәд, Эн түрүләд хойр туршулч тәвнә. Хойр көвүн балһснд күрәд, нег Раав нертә күүкд күүнә герт зогсад, хонхар шиидв. Раавин гернь балһсна эрст углата билә.

Энүнә тускар Иерихона хан эврәннь зарцнрасн медәд, эн израильтянриг бәрәнд автха гиҗ закв. Зуг Раав көвүдиг гериннь ора деер бултулчкад, хаана зарцнрт келв:

- Э-э, нанур хойр күн орҗ ирлә. Би тедниг таньдн угав. Харңһурхла эдн йовҗ одла. Көөлттн эдниг, тадн эдниг одачн күцҗ чадхит!

Хаана элчнр израильтянриг күцхәр көөлдәд һарв. Раав гиичнрүрн ора деегшән һарад, келв:

- Эн һазриг Деед Эзн таднд өгсиг би меддүв. Иерихона цуг бәәрн улс таднас әәҗәнә. Тадниг Египтәс һарад йовҗ йовхла, Деед Эзн ямаран өврмҗтә йовдл һарһсиг, болн Улан теңгсин усн өмн бийдтн зааград әңгрсиг бидн соңгславидн. Мадн әвр гидгәр әәцхәввидн, юңгад гихлә Деед Эзн, тана Бурхн, теңгр чигн, һазр чигн эзлсн Бурхн болҗана. Тегәд ода би таднд сә кесн төләд тадн намаг болн мини элгн-садн улсиг үкләс гетлгх үгән нанд өгтн. Маниг харсх нег темдг нанд өгтн.

Раавиг болн энүнә өрк-бүлиг харсх үгән көвүд гергнд өгв. Тегәд Раав көвүдт терзәр деесәр буухднь нөкд болв. Мендләд һарчаһад, израилин көвүд Раавд эдн буусн улан деес терздән боотха гиҗ келв. Эннь лавта темдг болх, тегәд Раав болн энүнә герт бәәсн улс әмд үлдх. Түүнә хөөн көвүд балһснас һарч йовцхав.

Эдн эн-тер уга Иисусур ирәд, эднлә юн болсинь иим үгмүдәр чиләв:

- Деед Эзн цуг һазриг мана һарт бәрүлв, цуг теднә бәәрн улс маднас чичртлән әәҗәцхәнә.