Иерихон эзллһн

Израильтянрас әәһәд, Иерихона бәәрн улс балһснаннь цуг үүдд хаав. Күн чигн һардго, күн чигн ордго болв.

Деед Эзн Исус Навинд келв:

- Би чини һарт Иерихон, энүнә хааг, цергиг өгчәнәв. Цергчнр зурһан өдр даранднь балһс эргәд йовцхаг. Долан Бурхна гелңгүд долан бүшкүр бәрәд, Деед Эзнә Бооцана хәәрциг өмннь йовтха. Доладгчднь балһсиг дола дәкҗ эргтн, Бурхна гелңгүд бүшкүр таттха. Тадн эн саамла нег чигн үг келлго, тагчг йовтн. Чини шишлң докъяһар цуг әмтн чаңһур хәәкртхә, балһсна эрснь нурад унх. Тер цагла цергчнр тус-тустан эврәннь таласн балһснд орцхаг.

Иисус Навин Бурхна цуг заквриг Бурхна гелңгүдт болн цергчнрт күргв. Цуг алтн, цаһан, улан мөңгн, төмр кегдлмүд Деед Эзнд нерәдгдх гиҗ бас эн келв. Бийдән Иерихонас тас юм бичә автха гиҗ бас эн келв, авсн күн хәәчлә харһх.

Израилин әмтн цуг келсн хамгинь дигтнь күцәв.

Израилин церг һарад йовв. Өмннь долан Бурхна гелң бүшкүртәһән, теднә ард Бооцана хәәрциг, теднә ардас израильтянр бүшкүр татлдад йовв. Иисус цугтад шишлң заквр өгтл, цуг әмтн тагчг йовтха гив.

Зурһан өдр дарандан әмтн ә-чимән уга балһсиг өдрт нег эргәд йовцхав. Доладгч өдртнь өрүн эрт эдн бас тагчг Иерихон балһсиг эргәд йовцхав, зуг Бурхна гелңгүд бүшкүрән татлдад йовцхав. Әмтн балһсиг дола эргчкхлә, Бурхна гелңгүд бүшкүрдв, Иисус закв:

- Хәәкртн!

Цуг цергчнр чаңһ дууһарн хәәкрлдв. Эн цагла балһсна эрс чичрв, энүнәс ик-ик чолуд экләд унцхав. Дарунь ик бат эрс тарад унв. Зуг эрсин нег бичкн әңгнь үлдв, терүнд Раавин гернь бәәҗ.

Израильск цергчнр дарунь балһснур дәврв, агчмин зуур энүг эзләд авчкв.

Иисус Навин туршулч ирсн көвүдт Раавиг өрк-бүлтәһинь гертәснь һарһтха гив. Көвүд эдниг олҗ авад, израильтянр бәәршлҗәсн Галгала тал күргв. Иерихон бүклдән нурагдв.