Улан мөңгн моһа

Израиль удан цагт көдә һазрар зуульчлв. Зәрмдән эдн Ханаанск һазрур өөрдәд ирсн кемлә үүлн талдан үзгүр нүүдг билә, тегәд израильтянмуд хәрү көдәд ирдг билә. Тер учрар цуг әмтн күрхәр седдг Бурхна өгнәв гисн һазрур зөрсн әмтн һунддг билә. Кемр евреймуд көдәд һундрхад эс йовсн болхла, Деед Эзн эдниг кезәнә Ханаанд күргхмн билә, зуг эдниг засглад, кесгтән тиигәрән авч ирлго зовав.

Нег дәкҗ эдн саак Бурхна болн Моисейин өмнәс буцв:

- Юңгад тадн мадниг Египетәс һарһвт? Эн көдәд мадн харһнад үкхвидн. Энд өдмг чигн, усн чигн уга, эн һуйртн хоолд зогсчана.

Тиигхләнь Бурхн евреймудиг чаңһар засглв: хорта моһасар зуулһулв. Хорта моһас зууснас көлтә олн әмтн хорв.

Израильск келн улс буру һарһсан медәд, Моисейд иигҗ келв:

- Деед Эзиг болн чамаг гемшәһәд, мадн килнц һарһвидн. Бурхн мадниг эн моһасас гетлгтхә гиҗ зальврнчн.

Эврәннь келн улсин төлә Моисей зальврв. Бурхн зальвринь соңсхларн, терүнд иигҗ закв:

- Улан мөңгәр моһа ке. Терүгән ут моднд өлг. Зуулһулсн әмтн цуһар улан мөңгн моһаһур хәләтхә ги, тиигхлә эдн цуһар әмд үлдх.

Моһас зууснас көлтә зовҗах әмтн буудлын ямр нег булңгас улан мөңгн моһаг үзҗ чадв. Терүг үзн, гемндгән уурад, эрүл-менднь батрад, чидл орцхав. Бурхнд иткәд, улан мөңгн моһаһур хәләсн израильтянмуд чикрәд, гемтдгән уурхларн, Бурхнд магтал өргцхәв. Болв, харм төрхд, улан мөңгн моһаг хәлән, эдгҗ болх гиснд зәрмнь иткгдго билә. Итклго, моһа тал хәләдго билә, тегәд тедн әмәрн шордцхав. Улан мөңгн моһа биш, Бурхн әмдрл заясмн! Әмтн болхла әмән аврхин төлә зуг иткх болн Терүнә келсиг күцәһәд зөвтә бәәсмн.