Хадас һарсн усн

Нег ормас талдан ормур йовад йовҗ, израильтянмуд дала цаган көдәд давулв. Нег дәкҗ эдн усн уга һазрт ирв. Тер учрар эдн яһв? Бурхнд зальврв, аль саак һундл өргцхәв? Харм төрхд, урдк кевәрн зовлң учрхла, эдн Моисей Аарон хойрт һундл өргҗ, гемшәв. Эдн иигҗ келв:

- О, юңгад мадн эртәр сәәһән эс хәәввидн? Көдәд хортха гиһәд, тадн мадниг Египетәс авч һарвт? Энд смоковниц чигн, уста үзм чигн, ямаран чигн зер-земш уга, ода болхла усн чигн уга!

Бурхнд итклго йовсн учрар эдн ода күртл көдәд йовхан мартҗ.

Эднә һундлһ соңссн Моисей Аарон хойр ик гидгәр һашудв. Әмтнәс хооран һарчкад, эн хойр скиниян өмн унад, зальврв. Дарунь Бурхн эднлә күүндв. Моисейд Бурхн иигҗ келв:

- Мотран авад, әмт хура. Дарунь хад тал өөрдәд, ус өг, гиҗ сурхлачн, хадас усн һооҗх.

Моисей Аарон хойр келн улст йир уурта билә. Эдн келв:

- Зәкргддго улс, соңстн, эн хадас таднд ус олхмби?

Тиигҗ келн, Моисей мотрарн хойр дәкҗ хадыг цокв: урсхл түргәр һооҗхла, әмтн бийснь ус уулдад, малан услцхав.

Моисей Аарон хойр чик йовдл һарһви? Хадыг цокх зөв уга билә, сурхмн билә! Терүнәс нань, хадас ус һарһҗ болх, угай гиҗ Моисей болн Аарон алңтрҗасн билә.

Тиим болв чигн Деед Эзн әмтиг хәәрлҗ, ус өгв. Моисейиг болн Аарониг засглв:

- Иим йовдл һарһсн учрар та хойр Ханаанск һазр ишкгот.

Тер хойрт энтн йир күчр засглһн болв. Авраам тәклин ор кеһәд, мөргдг Ханаанск һазриг Моисей эн насндан үзнь гиҗ күсл кеҗ йовсмн. Эн йовдлын хөөн күслнь күцшго болв.

Моисей йир номһн, төвшүн күн билә. Израильтянмуд кедү дәкҗ хара зөңдән энүнд һундл өргәд, һундасн бийнь, нег чигн шүрүтә үг эднд келсн уга. Зун эн саамд эн бийән бәрҗ чадсн уга.