Туршулчнр

- Энтн йосндан байн һазр, - гиҗ Иисус Навин зәңглв.

Цуг әмтн күрхәр седдг Бурхна өгнәв гисн һазр ямараннь медәд иртхә гиһәд, наадк арвн негн отгин улсла Моисей энүг илгәсн билә.

Дөчн өдртән эдн тер һазриг кедв. Хәрҗ ирхләрн, эдн байн тәрәнә, өргн хадлһна һазрмудын болн ө-шуһу моддын тускар келцхәв. Сала уста үзм авч ирв. Тернь хойр залу күн моднд дүүҗләд, әрә даам ик. Туршулчнр цуһар нег дууһар иткүлв:

- Ханаан - энтн үсн болн бал һоҗҗах һазр.

Тиигәд келн, эдн невчк эмәсн бәәдл һарцхав. Тиигҗәһәд негнь зөргшләд, келв:

- Моисей, тер һазр күчр сән болв чигн, мадн терүг эзлҗ чадшговидн. Тенд бәәдг келн улс дегд чидлтә!

Тер һазрин ик өндр нурһта улсин болн балһсдыг хашалсн күчтә эрссин тускар туршулд йовсн наадк залус экләд келцхәв.

Эдниг соңсхар ирсн улс ууртаһар хәәкрцхәв. Иим арһ уга бәәдлд тусхаввч мадниг, гиҗ Моисейиг гемшәҗ, эдн уурлцхав.

Генткн шууган дотр нег күн дууһан чаңһаснь соңсгдв. Тер Иудын төрләс шин һазр шинҗлхәр йовсн Халев бәәҗ.

- Мадн тедниг диилҗ чадхвидн! - гиҗ эн хәәкрв. - Нанд итктн! Хамгин түрүнд Бурхнд! Эн һазр маднд өгх үгән өгләхн. Маднд нөкд болх!

Иисус Навин Халеваг дөңнв:

- Зөргән бичә геетн! Нүдн әәдг гидг. Бурхна өмнәс зуг бичә сөрлцтн!

Әмтнә уурта хәәкрлһиг Иисус Навина болн Халеван келсн үг зогсав. Ууртан бүтсн әмтн эдниг соңсхар седсн уга. Генткн әрүн шатр деер Деед Эзн бууҗ ирсиг эдн тодрха үзв.

Хәәрлдҗәсн, үүмҗәсн әмтн тер дарунь тогтнв. Бурхн израильтянмудт ю келхәр бәәхинь медхәр, Моисей әрүн чинртә шатрур адһв.

- Эн келн улс нанд иткдго төләднь Би эднд моом хальданав! - гисн Бурхна әәмшгтә цааҗ тиим билә.

Эн сааҗ келн улсин килнц бас тәвтн, гиҗ Моисей Бурхиг эрәд сурв.

- Сән, - гисн хәрү Бурхн өгв, - чамаг сурсн учрар Би эн келн улсиг уга кешгов. Зуг Египетд болн эрм цаһан көдә һазрт Мини үүдәсн өвәрциг үзснь бийнь, дурндан бәәсн әмтн эцкнртнь хәәрлсн һазриг үзшго. Цуг әмтн күрхәр седдг Мини өгнәв гисн һазрт бәәршлх зөв эднд өгшгов!

Шин һазрт бәәршлхәс урд бүкл дөчн җилдән келн улс көдә һазрар кедх. Эн цагин эргцд икчүднь сәәһән хәәцхәх, зуг эндр бичкдүд бәәснләнь Иисус Навин Халев хойр Ханаан һазрт күрч чадх.