Алтн туһл

Моисей Бурхнла күүндәд, олн өдр Синай уул деер давулв. Әмтн болхла терүг ирхинь ядад күләцхәв. Моисейиг күлән гиҗ, эдн улм тесвр уга болцхав. Талдан келн улсла әдл бас эврәннь бурхта болҗ, терүнд мөргхәр седцхәв. Эднд шүтә үүдәтхә гиһәд Аарона ард орад бәәхләнь, тер тесч ядад, эднлә зөвшәрв.

- Не, сән, - гиҗ эн хәәкрв. - Би таднд шүтә кеҗ өгнәв!

Әмтнә үгд орхларн, Бурхна заавриг эвдҗәхән эн медлә, зуг эднлә зөвшәрлго, буру юм һарһҗанат гих зөрг энүнд уга болв. Әмтн өгсн алт хураһад, цутхад, шүтә кев. Цутхсн шүтәг әмтнд үзүләд тәвхләнь, тедн икәр байрлцхав:

- Тана бурхнтн эн!

Синай уулас бууҗ йовх Моисей әмтнә байрта шууга соңсв. Түрүн хәләцәс эн юн учрсиг медв.

- Ээ тадн, килнцтә улст! Тадн - бурхн уга улст! - гиҗ хәәкрв. Моисейин нүдн нульмсар дүүрв. Израилевин үрд ичрән гееһәд, әмд Бурхан хаяд, цутхсн туһлд мөргҗәнә!

Тиим килнцтә йовдл үзсн Моисей уурлад, чолун скрижали толһа деерән өргәд, цуг чидлән һарһад, хад цокхла, тернь хамхрад, умш-умшар тарҗ одв.

Дарунь Моисей алтн туһлыг уга кетн, гиҗ закв.

- Тадн чилшго күчр килнц һарһвт, - гив. Болв би дәкнәс уул деер һарад, тадна һарһсн гем тәвтхә, гиҗ Бурхнас сурнав. Тадна туст дәкәд нег тесвр һарһҗ, Бурхн тадна гемиг тәвх чигн.

Моисей дәкәд Синай уул деер һарч, келн улсиннь гем тәвтхә, гиҗ Бурхнас сурв.

- Кемр Чи геминь тәвҗ эс чадхла, кемр Чи эдниг уга кехәр седҗәхлә, - гиҗ эрн сурҗ, - намаг бас уга ке.

- Зуг килнц һарһсинь засглнав, Израилин келн улсиг уга кешгов. Йовтн, Авраамд, Исаакд болн Иаковд хәәрлсн һазр эзлтн. Би эврән таднла йовшгов, - гисн хәрү Бурхн өгв.

- Деед Эзн, - гиҗ Моисей эрн, сурв, - кемр Чи маднла эс йовхла, би әмтиг тиигәрән дахулҗ йовшгов, юңгад гихлә Чамаг угаһар мадн дуту хөвтә улс болхвидн!

- Моисей, Би чамд дуртав, - гисн хәрү Бурхн өгв, - тегәд чини сурсиг Би күцәнәв. Келн улсин килнцинь тәвҗәнәв, таднла хамдан өгнәв гисн һазрур йовнав.

Хөөннь Бурхн шин чолун скрижали кех - арвн зааврмуд терүнд бичх заавр Моисейд өгв.