Синай уул

Үүлн зогссн һазрт израильтянмуд шатрмудан татв. Нег чинртә юм келхәр Бурхн уул деер һар, гиҗ Моисейд закв. Моисей уул деер һархла, Бурхн энүнд келв:

- Египетск һазрас израильтянмудыг авад һархларн, Би эднә туст өршәңгү седклтә йовсиг үзвч. Мини заавриг күцәх угаһинь йовад, теднәс сур.

Моисей уул деерәс бууҗ ирәд, Бурхна келсиг соңсхит, гиҗ израильтянмудас сурв. Тедн иим хәрү өгв:

- Э, Бурхна келсиг цугинь күцәхвидн.

Тиигхлә Моисей хәрү уул давшад, Бурхнур ирәд, келн улсин хәрүг келҗ өгв.

Бурхн келв:

- Чамар дамҗад, Моисей, Би теднлә күүндхүв. Ода бууһад, Би теднлә күүндхүв ги, белн болтха.

Моисей израильтянмуд тал ирәд, иигҗ келв:

- Һурв хонад тадн Бурхиг соңсхит, уулын ора деер Терүг үзхит. Хувц-хунран уһаһад, цевр хувц өмсәд, Деед Эзнлә харһхдан белн болцхатн.

Уул тал өөрдсн болн һар күрсн күн әмәрн шордх бәәсмн, тегәд күн бичә өөрдтхә гиһәд, Моисей уулыг эргүләд, татас татулв. Герин малыг бас уулур өөрдүлҗ болшго бәәсмн, тер юңгад гихлә Деед Эзни туурмҗар уул дүүрх бәәсмн.

Һурв хонад, өрүн эрт әмтн йир чаңһар оһтрһу ду һарсиг соңсад әәцхәв. Шатрмудасн һарад, Бурхн тал хәләцхәтн, гиҗ Моисей эднд келв.

Әәмшгтә юм эдн үзцхәв. Деед Эзн уулын ораһас һал болҗ бууҗ ирсн учрар Синай уул утаһар бүркгдәд, чичрәд бәәнә. Һал цәкләд, оһтрһу ду һарад, уулас утан һарад бәәнә, әмтн болхла әәһәд, чичрлдҗәнә.

Деед Эзн Моисейд келв:

- Нан тал уулын ора деер һар.

Моисей Бурхиг соңсад, олна нүүрт уулын ора деер һарв. Бурхн энүнд келв:

- Чамаг Египетин һазрас, мухлаллһна герәс авад һарсн Би Деед Эзн, Би чини Бурхн. Мини нүүрт чамд талдан бурхн уга болх зөвтә. Бийдән шүтә бичә ол, теднд бичә мөрг, бичә цергл. Хара зөңдән эврәннь Деед Эзнә нер бичә кел. Терүг әмрүлх бемб өдр бичә март. Зурһан өдртән көдләд, эврәннь кергән күцә, доладгч өдр - бемб өдр Деед Эзнә өдр. Һазр деер бәәхин төлә эк-эцкән күндл. Күүнә әм бичә тасл. Буру альҗас бичә һарһ. Эс өгсиг бичә ав. Хов-худл бичә кел. Күүнә юм бичә көндә.

Бурхн келәд дуусв. Бурхна чаңһ ду соңсхларн әәҗәсн улс байрлцхав. Моисей уулын ора деерәс бууҗ ирхлә, израильтянмуд терүн тал өөрдәд иигҗ келв:

- Бурхн маднла дәкҗ бичә күүндтхә, юңгад гихлә мадн дегд әәцхәввидн. Моисей чамд келтхә, чи маднд күргәд кел.

Тиигхлә Моисей уулын ора деер һарад, әмтнә келсиг Бурхнд күргәд келв:

- Дәкәд Чини ду соңсхасн эдн әәҗәнә.

Бурхн келв:

- Нанас әәҗәхнь йир сән. Би чамла күүндхв, чи Мини келсиг теднд күргәд келхич.

Уул деер һарад, терүнлә хамдан үлдтхә гиҗ Бурхн Моисейд закв. Дөчн хонгтан хот идлго, юм уулго Моисей тенд бәәв, болв Деед Эзн энүнә әм хәәрлҗ, үүлн һатцас күүнддг билә.

Цуцлад, нег ормас талдан ормд авч одад татхд амр әрүн шатр Терүнд тосхтха, гиҗ израильск келн улст Бурхн закв, гиҗ Библьд келгднә. Тер шатриг скиния гиҗ нерәдв. Әрүн чинртә скрижали – хойр хавтха чолуд сииләд һарһсн арвн заавр бичсн чолуг хадһлх яршгинь лир модар кеҗ, дотраснь, һазаһаснь алтар бүрлх бәәсмн. Эн яршгиг Бурхна хәәрцг (ковчег) гиҗ нерәдв.

Дарунь Бурхн Бийнь арвн заавр бичсн хойр чолун скрижали Моисейд өгв.