Иосиф мухлаллһнд

Иосиф мухлаллһнд

Нег дәкҗ Иаков Иосифиг хөд, ямад хәрүлҗ йовсн ахнрурнь йовулна. Эн келв:

- Йов, одад ахнран, теднә малнь сән бәәх угаһинь хәлә, хәрүһән авч ир.

Иосиф эцкиннь даалһвр күцәхдән байрлдг билә, эн тер дарунь ээлҗһ чигн, зарц чигн дахуллго хаалһд һарад йовв. Эн сәәхн хувцан өмсәд, эцкләрн мендләд, һарад йовв.

Нег күн харһад, ахнрнь альд малтаһан йовхиг зааҗ өгтл, Иосиф эднән зөвәр удан хәәв. Иосиф ахнрурн өөрдҗ йовхла, теднинь холас энүг үзәд, нег-негндән келцхәв:

- Эн зүүд зүүдлдг аашна, энүг алад, нег гүн нүкнд хайчкхмн, зерлг аңгуд Иосифиг шуучад хайчкв гиҗ эцкдән келхм. Тегәд хәләхм, яһҗ зүүдәрнь болдгиг.

Зуг эднә ик ахнь Рувим келв:

- Энүг алхм биш, цус асххм биш, энүг эн көдә һазрин шуурхан нүкнд хайчкхмн.

Рувим хөөннь Иосифиг бийнь сулдхад, эцкүрнь тәвхәр седҗәлә. Наадкснь соңсад, Иосифиг алшгоһар зөвшәрв. Эн ахнрурн өөрдм цацу, эдн энүг бәрҗ авад, сәәхн хувцинь тәәлҗ авв. Ахнрнь терүнлә ю кехәр бәәхинь Иосиф тер саамд медв. Эн һашудад уульв, эцкүрнь тәвтхә гиҗ эрәд сурв, зуг эдн соңссн уга, юңгад гихлә, эдн киитн хату зүрктә бәәсмн.

Эдн Иосифиг гүн нүкнд хайв. Эн ундан хәрүлх нег балһ усн чигн уга, чидл уга, харһнсн тенд кевтв. Дурта эцктәһән дәкҗ харһшгов гиһәд Иосиф икәр зовҗ.

Догшн ахнрнь энүнә түңшлһнд, уульлһнд оньган өглго, сууһад хотан әдлцхәв. Эн саамдан эдн нүүдл үзв. Эн Египтүр олн зүсн үнтә эд-тавр авч йовсн кувцнр бәәҗ. Иосифин ахнриннь негн, Иуда, келҗәнә:

- Эн нүүдл Египтүр йовҗ йовна. Эн Иосифиг мухлаллһнд хулдый! Тегәд маднд энүг алад керг уга, эн маднас хол бәәх.

Цувсн нүүдл өөрдәд ирхлә, ахнр теднд:

- Мадн таднд нег кү мухлад хулднавидн. Эн сәәхн, эрүл-менд, бат цогцта 17-та көвүн. Египетд энүнә төлә сән үн таднд өгх, тадн орута болхт.

Ахнрнь Иосифиг гүн нүкнәс деесәр татад һарһад, кувцнрт үзүлв, тедннь энүг 20 цаһан мөңгәр хулдҗ авв.

Һарһсн әср йовдлан дархин төлә, ахнрнь эцкдән Иосифин ямана цусар лашчксн хувц авч ирв, Иаков көвүнәннь хувц таняд, келв:

- Эн мини көвүнә хувцн, зерлг аңгуд энүг идҗ, лавта, Иосифиг шуучҗ.

Олн өдр эн дурта көвүндән гейүрв, болв юн чигн зовлңгинь хувалцсн уга.