Египетд

Кувцнр Иосифиг Египетүр авч ирәд, фараона харулын Потифар нертә ахлачд хулдсмн. Тенд Иосиф египет улсин кел шулуһар дасад, көдлмшән сәәнәр кедг бәәҗ. Удл уга Потифар энүг бийиннь нөкдәр тәвҗ. Бурхн деерәс Иосифиг хәр һазрт хәләһәд, хәәрләд бәәсинь медәд, тер ик гидгәр байрлсмн.

Потифар бийнь цаһан саната күн билә, болв терүнә гергнь хар саната күүкд күн бәәҗ. Нег дәкҗ герин эзн Потифар гертән уга бәәҗ. Гергнь болхла залудан Иосиф му йовдл һарһв гиҗ худл келәд, терүг гемшәв. Потифар икәр уурлад, буру эс һарһсн Иосифиг хаана түүрмд суулһҗ. Тиигҗ Иосиф түүрмд тусв, зуг Бурхн терүг түүрмд чигн хәләһәд, тусан күргсмн.

Түүрмин ахлач Иосифиг таасв. Тер итклтә күн бәәсинь медәд, эврәннь көдлмшән даалһдг бәәсмн. Удл уга эн Иосифиг түүрмд суусн әмтнә һардач кеҗ тәвв. Эн түүрмд хаана хойр зарц суусмн. Негнь хаанд чаһр утхҗ өгдг улсин толһач бәәҗ. Терүг чаһр утхач гиҗ нерәддмн. Хойрдгчнь хаана өмн бәәсн ширәд хот-хол тәвдг күн билә. Терүг өдмг өгәч гиҗ нерәддмн. Эн хойр буру йовдл һарһад, түүрмд суулһгдҗ. Нег сө тер хойрт зүүдн орҗ. Эдн тәәлвринь олҗ чадлго үүмлдәд бәәҗ. Иосиф эднд келв:

- Кемр Бурхн нанд зүүднә цәәлһвр өгхлә, би таднд нөкд болнав. Зүүдән нанд келҗ өгтн.

Тедн зүүдән келҗ өгхлә, Бурхн дарунь Иосифт тәәлвринь келҗ өгв.

Терүнә хөөн цөөкн җил давсмн. Нег сө тер түүрмәс хол, талдан герт, сәәхн чигн унтдг хорад египетин фараонд әәмшгтә зүүдн орҗ. Энүнә зүүднднь долан тарһн үкр Нил һолас һарад, эрг деегүр идшлҗәнә. Теднә ардас долан эццн, ясн арсн хойр болсн долан үкр һарч ирнә. Тедн тарһн долан үкриг идчкнә, болв идв чигн, эццн кевәрн үлднә.

Иим зүүд үзсн фараон сернә. Дарунь дәкәд эн унтад, оңдан зүүд үзҗ. Нег иш деер долан сән дүүрң буудян толһа урһҗ. Генткн теднә өөр хатҗ одсн, долан хумха буудян толһа урһна. Тер хумха буудян толһас дүүрң буудян толһас зальгад идчкнә. Тиим юм үзхд әәмшгтә болсмн.

Фараон киитн көлсән арчад серв. Зүүдн хара биш гиҗ ухалад, икәр зовҗ үүмәд, тәәлвринь медҗ чадсмн уга.

Тегәд эн Египет нутгин цецн ухата цуг улсиг хаана бәәшңгур иртхә гисн заквр өгв. Ирсн улст фараон зүүдән келҗ өгхлә, нег чигн күн тәәлвринь цәәлһҗ чадсн уга. Фараон уурлад, тедниг цугтаһинь көөв. Тиигхлә чаһр утхач терүнлә хамдан түүрмд суусн Иосифиг санад, фараонд терүнә тускар келв. Иосифиг шулун гидгәр авч иртхә гиҗ фараон гиҗ закв. Иосифиг ирхлә тер сурв:

- Чи зүүднә тәәлвр меддг күмбч?

- Уга, би меддгов. Зуг Бурхн нанд тәәлвринь келҗ өгх, - гиҗ Иосиф келв.

Фараон энүнд зүүдән келҗ өгхлә, Иосиф келсмн:

- Эн хойр зүүднә учр-утхнь негн. Долан тарһн үкр болн долан дүүрң буудян толһа долан җилдән Египетд элвг урһцта сән җилмүд болхин темдг. Долан эццн үкрмүд болн долан хумха буудян толһа долан җилдән харһнлһн болхин темдг. Эн долан харһнлһна җилмүдт орн-нутг кевтән хоосрх, элвг-делвг җирһләс юмн үлдшго, юңгад гихлә тер харһнлһн дегд күчр болх. Фараонд хойр дәкҗ нег учр-утхта зүүдд орснь иим: ода танд мини келсиг Бурхн лавтаһар күцәх.

Цугинь соңссн фараон икәр әәһәд үүмҗ Иосифас сурв:

- Мана орн-нутг иим догшн аюлас мөлтрҗ һарч чадхий?

- Һарч болх, - гиҗ Иосиф келв - Харһнлһн лавта ирх. Зуг та терүнд белдх зөвтәт. Египетин нутгиг залдг цецн ухата толһачиг тәвтн гиҗ би танд селвг өгчәнәв. Тер толһач долан җилин элвг урһцта буудяг долан җилин туршт хоршлҗ хадһлдг һазрт хураһад авх зөвтә. Тегәд хагсу долан җилин харһнлһн ирхлә, хот-хоолта бәәхит.

Иосифин келсинь фараонд таасгдв. Тегәд эн босад Иосифт иигҗ келсмн:

- Бурхн чамд цуг энүг секв. Тиим цецн ухата, чамла әдл күн уга. Чини келсн үгичн мини келн әмтн соңсх. Би чамаг цуг Египетин нутгт толһачар тәвҗәнәв. Зуг би сууҗах ширәһәрн чамас ахлхв.

Фараон келсн үгән иткүләд, һариннь хурһнас билцгән тәәләд, Иосифин хурһнд зүүв. Иосифт үнтә хувц өмскәд, күзүнднь алтн цев өлгв. Дәкәд фараон терүнд хозлг белглв. Тер хозлгла цуг харһсн улс өмннь сөгдх зөвтә бәәсмн.

Тиигҗ тер Иосифиг Египетин нутгин толһач кев. Иосиф дааврта кергән күцәхәр, дала көдлмш кенә. Түрүн болҗ иим заквр эн өгв:

- Цуг нутгин балһсдар буудя хадһлдг һазрмуд тосхтн.

Әмтн тер догшн цагла бичә үктхә гиһәд, эврәннь цаган нәр-нааднд Иосиф үрәлго, көдлмшән күцәһәд шунв.

Иим өврмҗтәһәр терүг Бурхн түүрмәс сулдхснднь, Иосиф йир икәр байрлад, ханлтан Бурхнд өргсмн. Эн һартан бәәсн йоснд болн үнтә хувцнд байрлҗасмн биш. Әмтнд сә кеһәд, харһнлһнас тедниг харсҗ авх арһ Бурхн терүнд өгснднь икәр байрлдг билә.

Тер цагт эн гер авч, терүнә гергнь Иосифд хойр көвү һарһҗ өгсмн. Эн даңгин көгшн эцкән сандг бәәҗ, терүнлә харһх цаг ирх гиҗ эн ицҗәсмн. Дәкәд эврәннь ахнрин тускар ухалад, тедн хар саната йовдл кесндән килнцән Бурхнас сурх гиҗ иткдг билә.

Иаков эцкиннь цуг өрк-бүлиг болн египетин улсиг харһнҗ бичә үктхә гиһәд, Бурхн Иосифиг мухлалһнд хулдад, Египетүр илгәснь Иосифд медгдҗәнә.