Иосифин зүүдн

Иаков 12 көвүтә бәәҗ. Көвүднь өсәд-босҗ. Хамгин бичкинь-отхн көвүн Вениамин бәәҗ. Эн көвүһән төрхд, Исаакин гергн Рахиль өңгрҗ. Рахилин наадк көвүн Иосиф, Вениамина деерк ахнь, дүүһәсн цөн насн ах бәәҗ. Эн көвүнь эцкдән әвр дурта болчкад, эцкиннь келсиг әвр соңсдг бәәҗ.

Иаковин арвн көвүнь ямад, хөд хәрүлдг бәәҗ. Эдн дару-дарунь зөвәр эндү һарһдг бәәҗ, эннь эцкднь таасгддго билә. Иосиф ахнртаһан йовхларн, теднә буру йовдл үзәд, цугинь эцкдән келдг бәәҗ. Иосифин тиим йовдл ахнриннь ур күргнә, тегәд эдннь дүүдән уурлад, дурго болна. Иаков болхла Иосиф көвүндән цугтаһаснь дурта болсн учрар, ик көвүдтән чик зөв өгдго болдг. Эцкин тиим бәәдләс көлтә, ик көвүднь дүүдән үлү үзәд, дурго болдг болв.

Нег дәкҗ Иаков Иосиф көвүндән нег онц сәәхн хувц уюлх даавр өгч. Тиим хувцн Иаковин нег чигн көвүнд уга билә. Эн учрас ахнрнь дүүдән улм икәр үлү үздг болв.

Зәрмдән Иосифд өвәрц зүүдн ордг бәәҗ. Нег дәкҗ Иосиф ахнртаһан кеер өвс хадад, баглад бооҗ йовсн болад зүүдн орна. Ахнриннь багла өвсн Иосифин баглсн өвснд цуһар мөргсн болна. Иосиф зүүдндән әвр гидгәр алң болад, тер зүүдән ахнртан келҗ өгнә.

Ахнрнь икәр уурлад, келнә:

- Бидн чамд мөргәд чөклх гиҗ санҗанч?

Удан боллго Иосиф дәкәд нег зүүд үзнә. Нарн, Сар, арвн негн одд энүнд мөргнә. Эн зүүдн энүнд йир соньн болҗ медгдв. Эн зүүдән Иосиф эцкдән, ахнртан келҗ өгнә.

Эцкнь энүг уурлад, келнә:

- Нарн-би, чини эцк, Сар-чини эк, арвн негн одд - чини ахнр болн дү ирәд, чамд һазрт күртлән мөргҗ-сөгдх гиҗ санҗахмн болвзач?

Болв эн зүүдинь Иаков тодлҗ авв. Ахнрнь болхла, Иосифд улм икәр уурлад, улм үлү үздг болцхав.

- Иосиф ик саната, бийән юн гиҗ эн санҗахмб? Бидн энүнд ю-бисинь медүлхвидн! - гиҗ эдн шиидв.