Ахнрин харһлһн

Цуһар ут хаалһдан байрллад йовцхав, юңгад гихлә Авраамд болн энүнә хөөт үйнрт Бурхн өгсн нутгур эдн адһҗ йовна. Зуг Исав эдниг яһҗ тосч авх гисн сурвр эдниг үүмүләд бәәв. Нег дәкҗ Исав Иаковиг алхар седсиг, Иаков мартад уга.Тегәд күүкдинь болн бийнь Исав алхий аль угай гиҗ эн әәҗәнә.

Исав дөрвн зун залу улсиг цуглулад өмнәснь йовулсиг Иаков медв, энүнә зүркнь менрҗ одв, ода ю кехм? Кемр Исав му сана зүүҗ ирхлә, Иаковд му болх. Эн гүүҗ һарч чадшго, юңгад гихлә олн мал, күүкд улс болн бичкдүд шулун гидгәр гүүҗ чадшго. Эдниг харсхин төлә йир цөөкн залус бәәнә.

Түрүләд Иаков сүрг малмудыг хойр әңгәр хуваһад, нег әңгинь өмәрән йовулна.

«Кемр Исав дәврхлә, Иаков нанд хар саната болхла, тегәд хойрдгч әңгнь гүүҗ һарч чадх», - гиҗ көвүдтән цәәлһҗ келв.

Бийнь Иаков түрүн өрәлән авад һарад йовв.

Асхарнь эн бәәрнәс босад һарад Бурхнд мөргв:

- Хәәрхн, чини әдст болн хәәрлтд күршгов. Намаг болн мини өрк-бүлиг хадһлҗ, хәләҗ йовхиг би ода сурҗанав, Исав мадниг бичә алг, чи өгсн үгән күцәх зөвтәч, чи мини үйнрт эврәннь хәәрлтән өгх үгән өгләч.

Маңһдуртнь өрүн өрлә Иаков һучн темәтә зарцнран ахурн йовулна. Тедн йовҗ одхла, Иаков дарунь хойр зун хөөтә зарциг йовулна. Дәкәд хөөннь ямадын, үкрин сүргүд, ээлҗң йовулсмн. Эн малмуд Исавд өгүлҗәх белг мөн. «Кемр Исав дару-дарунь мана белг авад бәәхлә, харһсн цагтан нанд уурлшго», - гиҗ Иаков санв.

Иаков Исавин өмнәс белгүдтәһинь эврәннь цуг улсан илгәв, зуг Исав ирәд уга бәәсмн.

Асхн болв, цуһар унтхар йовцхав. Сөөһәр Иаков босад, малмудан болн өрк-бүлән һолын урсхулар йовулад һарһв. Эврән болхла талдан көвәднь һанцхн үлдв. Генткн Нег Күн ирәд энүнлә ноолдна. Эн Күн Бурхна Элч бәәҗ. Эдн йир удан ноолдв, Иаков цуг чидлән агсҗ бийән харсв. Бурхна Күн диилҗ чадад, Иаковин ташаһарнь цокв. Иаков цааранднь ноолдҗ чадлго, дәәсиг чаңһар бәрәд бәәв.

- Тәв намаг, - гиҗ дәәсн келв, - юңгад гихлә өрүни солңһ һарчана. Зуг Иаков энүг тәвсн уга.

- Түрүләд нанд әдс өг.

- Чини нерн кемб? - Тер сурв.

- Иаков.

- Эндр өдрәс авн чини нерн Иаков биш Израиль болх, юңгад гихлә чи Бурхнла ноолдвч, чи әмтиг диилҗ чадхч.

Тегәд Иаков медв, эн күүнлә биш Бурхнла ноолдсан. Бурхн Иаковд әдс өгв.

Нарн дорд үзгәс һарч ирв. Нег Күн уга болҗ одв. Иаков арһул босад һолыг йовһар һатлв. Энүнә ташань өвдәд, доһлад йовв.

Удлго Иаков өрк-бүлән болн малмудан күцв. Холд йовх залусиг эн үзв. Эннь Исав зарцнртаһан билә. Иаков өмнәснь тосҗ һарв, терүнә зүркн бульглад бәәв. Иаков Исавин өөр ирәд, долан дәкҗ һазр күртл гекҗ мөргв. Исав гүүҗ ирәд, үмсәд, бийдән шахад келв:

- Иаков, чамаг үзәд йир байрлҗанав!

Иаковин зүркн тогтнв - Исав дәкҗ нанд уурлҗахш! Иаков йир икәр байрлв, юңгад гихлә ахин зүркн җөөлгдв. Иаковин зальврад мөргсиг соңсад, Деед Эзн Исавин зүрк җөөлүлв. Хоюрн байрлад уульцхав.

Исав Рахилиг, Лилиг, болн теднә күүкдиг үзәд сурв:

- Эдн кемб?

Иаков келв:

- Эдн мини үрдүд, Деед Эзн нанд белглв. Тиигхлә Рахиль, Лия, зарц күүкд улс, Иаковин үрдүд Исавд һазр күртл сөгдҗ мөргв.

Хөөннь Исав сурна:

- Хаалһдан би дала малмуд үзв, чи нанур юңгад өгүлвч? Нанд цуг юмн дала, ах мини, эн зөөрән бийдән үлдә.

Иаков Исавд келв:

- Мини белг ав, юңгад гихлә Бурхн нанд элвгәр белглв, нанд цуг юмн бәәнә.

Тегәд Иаков Исавиг эрәд сурв, тернь белгинь авв. Исав ахдан келв:

- Хамдан мини бәәсн һазрур йовий?

Зуг Иаков келв:

- Би шулун гидгәр йовҗ чадшгов, кемр мини үрдүдиг, малмудыг шулун гидгәр йовулхла, би малмуд уга үлдхв.

Тегәд Иаков Исавта йовсн уга. Тиигхлә Исав һазрин ца бәәсн Ханаанск герүрн хәрҗ ирв. Иаков болхла Иордан һазрт одад Ханаанск һазрас хол биш балһснд Сихемд бәәршлв. Эн эврәннь шатран тәвәд, Деед Эзнд сөгдәд мөргәд, терүнд тәкл тәвв.