Иаков күүнә һазрт бәәсн цагин туск келвр

Иаков наһцхиннь бәәдг һазрур һарад йовҗ. Йир удан болн күнд хаалһнь болсмн. Аш сүүлднь эн һазрур ирнә. Тенд ирәд, хөөчнрәс Иаков сурв:

- Лаван гидг нертә кү тадн меддвт?

- Меддүвидн. Хөөдән тууһад аашсн тер күүк үзҗәнч? Эн Лавана отхн күүкн Рахиль.

Иаков наһцхиннь һазрур ирсән медәд, Бурхндан ханлтан өргв. Рахилин тууһад ирсн хөөдиг Иаков худгас услв. Эн күүкн йир сәәхнинь Иаков тер дарунь медсмн. Зуг Рахильд эврәннь тускар эн келәд уга бәәҗ.

Тегәд күүкн сурҗана:

- Чи юңгад нанд нөкд болҗанач?

Иаков иим хәрү өглә:

- Кесг җил хооран чини һаһа Ревекка Ханаан һазрур эндәс мордад йовҗ одла.

- Би меддүв. Мини эцк Лаван нанд келлә. Чи кембч? - гиҗ күүкн сурв.

- Би Иаков, Реввекин көвүмб. - гиҗ Иаков келв.

- Тегәд чи мини төрл-садн болҗанач. Манаһур шулуһар йовий! - гиһәд Рахиль герүрн гүүҗ одад, эцкдән Иаковин тускар келҗ.

Лаван икәр байрлҗ Иаковиг тосад келв:

- Мини герт орад гиич бол!

Лавана герт бәәсн улс бас байрлад, ширә деер олн зүсн әмтәхн хот тәвәд, Иаковла тиигҗ таньлдсмн. Теднд Иаков бийиннь болн Исаак эцкиннь тускар дала юм келҗ өглә: Исаак эцкнь көгшрәд нүднь сохрснь, Ревекка экнь әрүл-менд бәәхинь бас келлә. Бийиннь тускар болхла иигҗ келсмн: Мини эцк Исаак хойр икр көвүтә, би тер хойр икрин өрәсмб, отхн көвүнь болҗанав. Намаг эцкм өнч эзлгч көвүм гиҗ нерәдәд, әдс өгч йөрәлә.

Иаковас Лаван сурв:

- Иаков нанд келҗ ас: «Исаак эцкчн чамаг манаһур йовх зөв өглү?»

Тиигхлә Иаков келсмн:

- Эцкм намаг йовулла. Би эндәс герг олҗ авх зөвтәв.

Иаков Рахильд дуран өгәд, тегәд эн күүкн терүнә гергнь болх гиһәд дотран санад авчксн бәәҗ. Лавана герт Иаков сардан бәәһәд көдлв.

Нег дәкҗ Лаван терүнәс сурна:

- Кесн көдлмшиннь төлә ю авхар седҗәнәч?

Иаков урднь энүнә тускар ухалсн бәәҗ, тегәд келв:

- Лаван, та меднәлмт, кемр ямаранчн күн гер авхларн, күүкнә эцкднь мөңг өгх зөвтә. Би болхла танд Рахилин төлә долан җилин туршарт көдлнәв.

Лаван байрлҗ келв:

- Күүкн Рахилян талдан күүнд өгсн дорхнь, чамд өгсн деер.

Тегәд Рахилиг авхар Иаков долан җилдән көдлсмн. Иаков Рахильд йир дурта билә, тегәд эн долан җил Иаковд цөөкн өдр болҗ медгдв. Зуг болзг күцәд ирв. Хүрм болх өдр болв. Хүрм болхла тер һазрин улс күүкиг альчурар хаадг авъяста бәәҗ. Хүрмин хөөн маңһдуртнь күргн күүкнә чирә үзв. Күүкн альчуран тәәлхлә, Иаков әәҗ: мордулҗ авсн күүкнь Рахиль биш, Рахилин эгч Лия бәәҗ.

Иаков Лаванур гүүҗ одад келсмн:

- Юн болҗахмб?! Би Лиян биш, Рахилин төлә долан җилдән көдлләв! Та яһад намаг меклвт?

Лаван иим хәрү өгч:

- Бичкн күүкиг ик күүкнәс түрүләд мордулдг авъяс мана һазрт уга.

Тиим хәрү соңсад, Иаков һазр деер сууһад уульв. Ода ирҗ эн меклгдсн күүнә зовлң медв. Тегәд Лаван Иаковд келв: Би чамд Рахилиг мордүлҗ авх өгнәв, зуг Рахилин төлә долан җилдән көдлхич.

Тер цагт залу күн кесг герг авч чадх бәәсмб, Лаван келсинь соңсад Иаков зөвән өгв. Долан хонгин хөөн, дәкәд нег хүрм болҗ. Эн хүрм худл уга болв. Иаков дурта Рахилян мордулҗ авв.

Дәкәд долан җил Иаков хадм эцкдән көдлсмн. Эн долан җил чилв, зуг Иаков цааранднь Лаванд көдләд бәәсмн. Ода болхла эн күүкнә төлә биш, бийиннь үкрмүдин, хөөдин болн ямадын төлә көдллә, юңгад гихлә Иаков тер малмудын эзн болсмн. Дәкәд Иаков арвн хойр үртә: арвн негн көвүтә болн нег күүктә билә. Эн йир байрта билә. Деед Эзн Бурхн Иаковиг хәләһәд, терүг әдсләд бәәҗ. Болв Лавана көвүднь Иаковин байн зөөрт үлү үзҗәхинь Иаков медв.

Эн цагла Бурхн Иаковд келв: Эврәннь өрк-бүл талан, эврәннь эцкин һазрур хәр.