Петрус зинданда

Рим императори Гай Қәйсәр Улуқ Һиродниң нәвриси Һирод Агрипани Йерусалимниң вә Палестининиң йоған қисминиң һоқуқдари қилип қойди.

Униң башқурушида мәсиһийләр әшәддий зиянкәшликкә учриди. Һирод йәһудий йетәкчилири билән уларниң тәрәпдарлириниң Әйса Мәсиһниң әлчилирини вә барлиқ шагиртлирини өч көридиғанлиғинини билгән. Шуңа у уларни рази қилиш үчүн, әлчиләрниң бири, йәни Юһаннаниң қериндиши болған Яқупни өлтүрүшни буйрийду. Йәһудийлар буни көрүп рази болиду, шуңа у Петрусни тутқун қилишни буйрийду.

У Петрусни зинданға солап, он алтә әскәргә уни кечә-күндүз күзитишни буйрийду.

Һирод әлчи Петрусни өлүмгә мәһкүм қилип униң өлтүрүлүш күнини бәкитиду, лекин җамаәт униң үчүн Худаға қаттиқ дуа қилиду! Бу вақитта башқа әлчиләр Йерусалимда йоқ еди. Улар Һиродниң зиянкәшлигидин қечип қутулуш үчүн, шәһәрдин кәткән еди. Лекин әлчиләрдин сирт, Йерусалимда Әйса Мәсиһниң нурғунлиған башқа шагиртлири бар еди. Мана шулар Юһаннаниң оғли Мәрийәмниң өйидә бирликтә Петрус үчүн дуа қилиду.

Петрус болса зинданда ухлап қалған еди. Икки әскәр дайимән униң билән болди. Буни аз дәп, зинданниң ички вә сиртқи ишиклиридә, вә шундақла тала тәрәптики дәрвазида күзәт қилип турған әскәрләрму бар еди. Петрус зади қечип қутулалаттиму?! Яқ. У һәм бундақ қилишқа тиришмиди.

Лекин күтүлмигән бир иш йүз бәрди. Туюқсиз Худаниң Периштәси Петрусниң алдида пәйда болди. Униңдин нур чақнап туратти. Петрус чоңқур уйқиға патқан еди, шуңа Периштә уни ойғитиш үчүн, униң биқиниға иштирип:

- Тез тур! – дәп ейтиду.

Шу ан униң қолидики зәнҗирләр чүшүп кетиду. Периштә Петрусқа бәлбеғини, аяқ кийими билән кийимини кийишини буйрийду. Бу вақитта әскәрләр ухлавататти.

Андин Периштә униңға:

- Мениң кәйнимдин маң! – дәйду.

Петрус униң кәйнидин меңип зинданниң очуқ турған ишигидин өтиду. Периштә Петрусни йетәкләп ухлаватқан әскәрләрниң йенидин та төмүр дәрвазиғичә апириду. Дәрваза уларниң алдида өзлигидинла ечилип кетиду. Улар биллә шәһәргә чиқип бираз маңғандин кейин Периштә йоқап кетиду.

Петрус есигә келип:

- «Әнди мән бу ишниң растлиғини билдим. Рәббим бир Пәриштә әвәтип, мени Һирод ханниң қолидин вә йәһудийларниң маңа қилмақчи болған барлиқ зиянкәшлигидин қутқузупту», деди.

Андин у шу вақитта нурғун ишәнгүчиләр жиғилип униң үчүн дуа қилған йәргә бариду. У ишикни қақиду, ишикни ечиш үчүн хизмәтчи қиз чиқиду. Бу қиз Петрусниң үнини аңлап, һаяҗан ичидә дәрвазини ечишниң орниға өйгә жүгрәп кирип кетип, Петрусниң ишикниң алдида турғанлиғи тоғрилиқ хәвәр қилиду. Шагиртлар ишәнмәй униңға Худа әвәткән Периштә кәлгән болуш керәк дәп ейтиду.

Петрус болса ишикни давамлиқ қақти. Улар дәрвазини ечип Петрусни көргәндә, һаң-таң болушти. Улар қин-қиниға патмай хошал болди! Петрус дүшмәнләрниң буниң тоғрилиқ билип қалмаслиғи үчүн, қол билән уларға җим болушни шәрәт қилди. Улар тиничланғанда, Петрус уларға Рәб Әйсаниң уни карамәтләрчә зиндандин азат қилғанлиғини сөзләп бәрди.

Андин Петрус Һирод уни тапалмаслиғи үчүн, Йерусалимдин кетиду.