Табитаниң тирилдүрүлүши

Бир күни әлчи Петрус дөңләрниң арисида җайлашқан, Йерусалимдин жигирмә километр жирақлиқта турған бир мәлигә бариду. Бу мәлә Лидда дәп атилатти. Лидда мәлисидики нурғунлиған адәмләр Рәб Әйсаға ишинәтти, шуниң үчүн Петрус уларни йоқлашни яхши көрәтти. Әнеяс исимлиқ бир киши қаттиқ ағрип қалған еди. У сәккиз жил паләч кесили сәвәвидин орнидин туралмай ятқан еди. Петрус униңға:

- Әнеяс! Сени Әйса Мәсиһ сақайтти. Орнуңдин тур! – деди.

У шу ан орнидин туруп кетиду. Петрус униңға: «Мән сени сақайттим» демиди, сәвәви у билгән: кесәлни пәқәт Әйса Мәсиһниң қудрити сақайтиду. Әнеясниң кесилини билгәнләр уни көрүш үчүн жүгрәп келишти. Улар Әнеясниң сақ екәнлигини көргәндә, уларниң нурғунлири Рәб Әйсаға ишәнди.

Лиддадин оттуз километр жирақлиқта Җаффа дәп атилидиған бир шәһәр бар еди. Лиддада туридиған бәзи адәмләр у йәргә берип Петрусниң паләч кесилини сақайтқанлиғини вә униң күчини Әйсаниң намида әслигә кәлтүргәнлигини ейтип бәрди.

Буни аңлиған халайиқ әлчи Петрусни тәклип қилиду, сәвәви шу вақитта уларниң җамаитидин болған бир аял қайтиш болған еди. Униң исми Табита еди. Бу аял кәмбәғәлләргә нурғун ярдәм бәргән, шуңа хәлиқ һаза тутуп жиғлимақта еди. Табитаниң достлири уни йәрләш үчүн һәммини тәйярлайду, лекин йәрләшниң алдида Петрустин улар тәрәпкә келишини сорайду. Петрус Җаффаға келип, Табита вә униң достлири билән тул аяллар жиғилған өйгә кириду. Бечарә аяллар көз йеши қилип, Пертусқа Табита улар үчүн тикип бәргән кийимләрни көрситиду. Улар Табитаға бағлинип қалған еди, сәвәви бу аял уларни интайин сөйәтти.

Петрус һәммисиниң өйдин чиқип турушини сорайду. Һәммиси сиртқа чиққандин кейин, у тизлинип туруп Рәб Әйсаға дуа қилиду вә қайтиш болған аялға:

- Табита! Орнуңдин тур, - дәйду.

Аял көзлирини ечип Петрусқа қарайду, андин олтириду. Кейин Петрус униңға қолини сунуп орнидин турушқа ярдәм бериду. Андин һаяҗан ичидә күтүп турған ишәнгүчиләр билән тул аялларни чақирип тирик Табитани уларға қайтуруп бериду. Униң достлири наһайити хошал болиду!

Рәб Әйса Петрусниң дуайиға җавап берип бу мөҗүзини яратти. Буниң тоғрилиқ һәммиси хәвәр тепип, нурғун адәм Рәб Әйсаға ишиниду.