Әйсаниң тирилиши

Таң атмай туруп бирнәччә аял – икки Мәрийәм билән Саломи – Йерусалимниң тар кочилирида кетип баратти. Уларниң йүзлири немишкә шунчилик ғәмкин? Сәвәви уларниң һәрбири қәриздар болған Әйса өлгән еди! Улар әнди бурунқидәк Уни тиңшалмайду вә Униңға ярдәм берәлмәйду. Шуңлашқа һазир улар өзиниң Устазиға ахирқи һөрмитини көрситишни халайду, у болсиму Униң тенини әттирләр билән сүртүш.

Аяллар йолда кетип барғанда “Биз қандақму өңкүрни йепип турған йоғандин-йоған ташни еливетәләймиз?” дәп әнсириди. Ахири улар Әйсаниң тени қоюлған өңкүргә йәтти. Лекин улар немини көриду? Таш чәткә еливетилипту, шуңа өңкүргә бемалал киргили болиду! Аяллар йеқин келиду. Өп-чөридә һечким йоқ еди. Шуниң билән улар аста өңкүрниң ичигә кирди. Өңкүрниң ичидә улар Әйса ятқан таш үстәлниң бош екәнлигини көрди! Бу немә аламәт? Бирси Әйсаниң тенини оғрилап кәттиму?

Улар Әйсаниң қайта тирик екәнлигини билмәтти. Шу сәвәптин өңкүрдә Униң тени йоқ еди.

Таң атқанда бир мөҗүзә йүз бәрди: Әйса Мәсиһ тирилди! Адәмләр Әйсаниң өңкүрдә йоқ екәнлигини ениқ билиш үчүн асмандин ялтириған бир Периштә чүшүп ташни еливәтти. Қәбирни күзәт қилип турған әскәрләр қорққинидин қечип кәтти.

Лекин аяллар буниңдин бехәвәр еди. Улар пәқәт қуруқ қәбирни көрди. Бу сәвәптин Мәҗдәллик Мәрийәмниң көңли интайин йерим болди. Башқа аяллар немә қилиши керәклигини ойлап турғанда Мәҗдәллик Мәрийәм Петрус билән Юһаннаға бу йеңилиқни йәткүзүш үчүн шәһәргә жүгрәп кәтти. Туюқсиз улар ялтирап турған кийимләрни кийивалған бир Периштәни көрди. Периштә уларға әҗайип бир йеңилиқни йәткүзди:

- Әйса Тирик! Қорқмаңлар! Шәһәргә тез қайтип берип, қалғанларға Әйсаниң тирилгәнлигини ейтиңлар!