Ибраһим билән Лут

Вақит өткәнсири Ибраһим билән Лут интайин бай болуп кәтти. Уларниң көплигән мал-варанлири вә алтун-күмүчлири бар еди. Лекин көп өтмәй уларниң арисида чүшәнмәсликләр пәйда болди. Уларниң мал-варанлири көпийип, уларға яйлақлар йетишмәйдиған болди. Шуниң билән уларниң хизмәткарлириниң арисида талаш-талтишлар болидиған болди.

Шуниң үчүн Ибраһим Лутқа:

- Биз болсақ уруқ-туққан, аримизда яки падичилиримизниң арисида талаш-тартиш чиқмисун. Айрим яшайли. Мана, пүтүн зимин сениң алдиңда турупту. Халиған йәрни талла! Оң тәрәпни таллисаң, сол тәрәп маңа қалсун, сол тәрәпни таллисаң, оң тәрәп маңа қалсун, - деди.

Ибраһим Лутқа қәйәрдә олтирақлишишни халиса, шу йәрни таллашқа йол қойди. Лут Иордан дәрияси ақидиған жилғиниң нәқәдәр мол екәнлигини көрди. Муқәддәс Китапниң ейтишичә, бу йәр Худаниң беғидәк, йәни җәннәттәк болған. Шуниң билән Лут бу гөзәл йәрни таллиди. У пәқәт өзинила ойлиған. Лекин у бу йәрдә немә болидиғанлиғини билмигән вә Худаниң Содом билән Гомора шәһәрлирини вәйран қиливетидиғанлиғини көз алдиға кәлтүрәлмәтти. Чүнки бу йәрдә туридиған адәмләр интайин яман болған. Лут Пәрвәрдигарни һөрмәтләтти, лекин шундақ болсиму Содомниң әхлақсиз хәлқиниң арисида турушни һечнәрсә әмәс дәп ойлатти.

Аридин бираз вақит өтүп, Худа Ибраһимға Өзиниң қарарини ейтиду:

- Содом билән Гомораниң хәлқи еғир гуналарни қилмақта. Мән чүшүп, бу гунакар шәһәрләрниң Мән улар үчүн тәйярлап қойған җазаға әрзийдиғанлиғини яки әрзимәйдиғанлиғини көримән.

Шуниң билән Пәрвәрдигарниң икки периштәси Содом шәһиригә әвәтилиду. Ибраһим болса Худадин мундақ дәп сорайду:

- Сән расттинла һәққанийларни гунакарлар билән бирликтә һалак қиламсән? Әгәр шәһәрдә әллик һәққаний адәм болса, Сән уларни сақлап қалмай, йәнила пүтүн шәһәрни харап қиламсән?

Шуниң билән Пәрвәрдигар Ибраһимға вәдә қилди. Ибраһим Худаға бу соални қайта-қайта қойди, лекин һәр қетим сориғинида униң ейтқан сани төвәнләтти: 45, 30, 20 вә 10. Вә һәр қетим Худа униңға уларни дәп шәһәрни сақлап қалидиғинини вәдә қилди.

Шундақ қилип һелиқи икки Периштә кәчқурун Содом шәһиригә кәлди. Шу чағда Лут шәһәрниң һөрмәтлик адәмлири жиғилидиған шәһәр дәрвазисиниң қешида олтиратти. У бу кишиләрни көргән һаман уларни өйидә қоналғиға чақириду. Лекин улар униңға:

- Яқ, биз талада қонимиз, - дәп ейтиду.

Лут Содомлиқларниң яқа жутлуқларға яман муамилә қилидиғинини билип, сәяһәтчиләрни өйигә мәҗбурий чақиривалиду. Улар кәчлик тамақни йәп болмайла, талада вараң-чуруң болуп кәтти. Содом шәһириниң адәмлири жүгрәп келип, Луттин яқа жутлуқларни уларға чиқирип беришини тәләп қилиду. Лутниң меһманларни қоғдимақчи болғанлиғини көргән Содомлиқлар уни қорқутушқа башлайду. Лекин Периштәләр болса Содомлиқларни қарғу қиливетип, Лутқа мундақ дәйду:

- Оғул-қизлириң, күйоғуллириң яки башқа туққанлириң болса, улар бу шәһәрдин чапсан чиқип кәтсун. Биз бу шәһәрни вәйран қилимиз. Чүнки кишиләрниң аһу-зари Пәрвәрдигарға йәтти, - деди.

Әпсус, лекин Лутниң кәлгүси күйоғуллири уни чақ-чақ қиливатиду дәп униңға ишәнмәйду. Вә Лут өзиму анчә алдиримиғачқа, Периштәләр уни, аяли билән қизлирини қолидин тутуп шәһәрниң сиртиға йетәкләп чиқарди, сәвәви Пәрвәрдигар уларға рәһим қилмақчи еди. Худа уларға кәйнигә қаримай жүгришини буйриди, лекин Лутниң аяли Худаниң сөзигә кирмиди. У бурулуп шәһәргә қариғинида шу ан таштузға айлинип қалди. Лут болса қизлири билән қечип кәтти...

Пәрвәрдигар Содом билән Гомора шәһәрлиригә асмандин гуңгут билән от яғдурди. Шуниң билән бу шәһәрләр, уларға йеқин мәһәлиләр вә шундақла Иордан жилғисидики барлиқ тирик җанлар вәйран болди. Бүгүн болса шу заманда гөзәл җилға болған җайда Өлүк деңиз бар. Бу деңиз Муқәддәс Китапта Туз деңизи дәп атилиду.