Бәш миң адәмниң тойдурулуши

Әйса кәч киргичә хәлиқ билән сөзләшти. Уни тиңшиғанларниң арисида аз дегәндә бәш миң әр киши бар еди. Аял кишиләр билән кичик балиларниңму сани буниңдин аз әмәс еди. Әйса пәқәт үгитипла қоймай, Униңға кәлгән кесәлләрниму сақайтти.

Кәч кирәй дегәндә, шагиртлар Әйсаға:

- Устаз, хәлиқ бирәр нәрсә йейиши керәк, - дәйду.

Әйса уларға күлүп қарап:

- Силәр уларға йәйдиған бирәр нәрсә бериңлар, - дәйду.

- Бунчивала хәлиқ үчүн биз йемәкликни нәдин сетивалимиз? Биздә бари бәш нан билән икки белиқ, - дәйду Филипп. – Бу йәрдә һечнәрсә йоқ. Буни аз дәп биздә ахчиму нурғун әмәс.

Әйса җававән:

- Маңа нанлар билән белиқларни елип келиңлар, - дәйду.

Шуниң билән Әйса нанларни елип улар үчүн Худаға рәхмитини ейтип Худадин уларни берикәтлишини сорап дуа қилиду. Андин у нанни уштуп шагиртлар тутуп турған севәтләргә салиду. У белиқларниму севәткә салиду.

Шагиртлар көзлирини сүртүп бир қариди, лекин чүшәнмиди. Бу қандақ болғини? Севәтләр кәйни-кәйнидин нан билән белиққа толуп туратти! Улар топ-топи билән бөлүнүп олтарған хәлиққә нан билән белиқни тарқатқанда, севәтләрдики йемәклик түгимәтти. Шуниң билән йемәклик һәммисигә йәтти! Һәрбир адәм тойғичә тамақланди.

Әйса зади Ким? Униң бунчивала мөҗүзиләрни яратқидәк күчи нәдин кәлди?

- Олтарғанларниң һәммисини бир арилап чиқип қалған йемәкликләрни жиғивелиңлар. Һечнәрсә зайә кәтмәслиги керәк, - деди Әйса шагиртлириға.

Улар қайтип кәлгәндә қоллирида ашқан-ташқанлар толған севәтләрни тутуп туратти. Хәлиқ тойғичә тамақлансиму, йемәклик техичә нурғун туратти!

Хәлиқ бу мөҗүзини көрүп һәйран болған һалда:

- Бу растинла дунияға келиши керәк Шу Пәйғәмбәр, - дәп ейтти.

Әпсус лекин бәш миң адәмниң арисида Әйсаниң һәқиқий мәхситини чүшәнмигән адәмләрму болди. Улар мундақ ойлатти: «Әгәр Әйса оңайла йемәкликни тапалиса, ундақта бизгә әнди ишләш керәк әмәс. Уни Падиша қилип сайлайли, шуниң билән У бизгә қарайдиған болсун».

Әйса адәмләрниң немини ойлаватқанлиғини биләтти, лекин У дунияға дунияниң падишаси болуш үчүн кәлмиди. Шуниң үчүн Әйса чапсан уларни ташлап, ялғуз дуа қилиш үчүн таққа чиқип кәтти.

Хәлиқ өйлиригә қайтти. Уларниң бәзилири Әйсадин үмүтсизләнди.