Кечидә кәлгән зиярәтчи

Өтүп кетиш һейтида Әйса нурғунлиған мөҗүзиләрни яратти, шуниң билән бирмунчә адәмләр Униңға ишәнди. Уни Қутқазғучи Мәсиһ дәп асасән гадайлар қобул қилатти, байлар болса көпирәк Униңдин гуманлинатти.

Лекин Йерусалимда растин Худаға муһтаҗ болған вә Униң билән йүзму-йүз сөлишиши керәк болған бир адәм бар еди.

У күндүзи келишкә җүръәт қилалмиди, сәвәви алий динний кеңәшминиң абройлуқ әзаси еди. У пәрисийләрниң динний еқимиға тәввә болуп, оқуған киши еди. Униң исми Никодим болған.

Башқа адәмләр билән чүшәнмәслик болмаслиғи үчүн, у Әйсаниң алдиға кечидә келиду. Никодим өйгә кирип:

- Устаз! Сизниң Худа әвәткән бир Устаз екәнлигиңизни билимиз. Чүнки Худа билән биллә болмиған адәм Сиз көрсәткән бу карамәт вә мөҗүзиләрни қәтъий көрситәлмәйду, - деди.

Никодим Әйса улуқ бир Устаз дәп ойлиған, лекин у Әйсаниң Худа Оғли екәнлигини билмигән. Әйса туюқсизла униңға һәрбир адәм Худаниң Падишалиғиға кириши үчүн йеңидин туғулуш керәк дәп ейтиду.

Никодим буни чүшинәлмиди. Шуңа у Әйсадин:

- Адәм қайтидин қандақ туғулалисун? У қайтидин бовақ болаламду? – дәп сорайду.

Әйса униңға адәм асмандин, йәнә Роһтин туғулуши керәк дәп җавап бериду. Лекин Никодим үчүн буни чүшиниш интайин қийин еди, шуңа Рәб Әйса униңға мундақ дәп чүшәндүрди:

- Һәрбир адәм гунакар, шуңа у өзи һәққаний болалмайду. Адәм пәқәт Муқәддәс Роһ арқилиқ өзгирип йеңи адәм болалайду.

Бу ишниң қандақ болидиғини адәм үчүн йошурундур. Әйса Никодимға бу сөзләрни чүшәндүриду:

- Шамал халиған йеридә чиқиду, сиз униң авазини аңлайсиз, лекин қәйәрдин келип, қәйәргә кетидиғанлиғини биләлмәйсиз. Шуниңға охшаш, Худаниң Роһиниң кишиләргә қандақ қилип һаятлиқ ата қилидиғанлиғиниму биләлмәйсиз.

Лекин Никодим бәрибир Әйсаниң бу сөзлирини чүшәнмәйду, шуңа у:

- Бу қандақ мүмкин болсун? – дәп сорайду.

Әйса униңға инсанниң пәқәт Худа Оғлиға болған ишәнчиси арқилиқ һәққаний болалайдиғанлиғини чүшәндүрүп, Худаниң Өзиниң оғлини инсанларниң гуналири үчүн қурван қиливетидиғанлиғини ейтиду:

- Худа Оғлини дуниядики инсанларни сораққа тартишқа әмәс, бәлки уларни қутулдурушқа әвәтти.

Көп өтмәй Никодим Рәб Әйсаға ишинип Муқәддәс Роһ арқилиқ йеңидин туғулиду. Шуниңдин кейин у уялмай вә хәлиқтин қорқмай, өзиниң Худа Оғлиға ишәнгәнлигини очуқ ейтиду. Әйсаниң дүшмәнлири Униңға қарши чиққанда, Никодим Уни қоғдайду.