Әйсаниң чөлдә синилиши

Худаниң вә Униң Оғлиниң әң яман дүшмини шәйтандур. Әйса Мәсиһ униң билән қаттиқ күрәш қилиду. Әйса Иорданда Атисидин йәрдики хизмитини қобул қилғандила бу күрәшкә киришти. Муқәддәс Роһ Әйсани шәйтан тәрипидин синилиши үчүн чөлгә елип бариду. Әйса чөлдә қирик кечә-күндүз роза тутуп, һечнемә йемәйду вә ичмәйду.

Һәрқачан адәмләрни гунаға аздурушқа тиришидиған аздурғучи шәйтан Униң қешиға келиду. Униң ойлишичә, Әйса һазир қосиғи ечип кәткәчкә аҗизлап кәтти, шуңа Уни аздурувелиш мүмкин. Шу чағда у мәхситигә йәткән болиду – әгәр Қутқазғучи гуна қилса, У һечқачан башқа адәмләрниң гуналирини Өзиниң үстигә алалмайду. Бундақ болғанда адәмләр һечқачан қутқузалмайду.

Шуниң билән шәйтан:

- Әгәр Сән Худаниң Оғли болсаң, мону ташларға буйриғин, улар нанға айлансун! – дәйду.

Лекин Әйса униңға:

- Инсан пәқәт нан биләнла әмәс, бәлки Худаниң еғизидин чиқидиған һәрбир Сөз билән яшайду, - дәп җавап бериду.

Шуниң билән шәйтан Әйсаға дәйдиған сөз тапалмайду. Шу чағда у йәнә бир қетим Уни аздурмақчи болиду. У Әйсани егиздин-егиз таққа чиқирип, Униңға дунияниң падишалиқлири билән уларниң шәривини көрситиду вә:

- Әгәр Сән маңа ибадәт қилсаң, буниң һәммисини саңа беримән, - дәйду.

Әйса униңға җававән:

- Йоқал Мәндин, шәйтан, чүнки Тәвратта: «Ялғуз Пәрвәрдигар Худайиңғила ибадәт қилип, Униңғила хизмәт қилғин» дәп йезилған, - дәп җавап бериду.

Һәзрити Әйса Муқәддәс Роһқа чөмүп, Иордан дәриясидин қайтип кәлгәндин кейин, Муқәддәс Роһ Уни чөл-баяванға елип барди.

Луқа баян қилған хуш хәвәр 4:1

Буниңдин кейин шәйтан Әйсани Йерусалимға елип келип, Уни ибадәтханиниң үгизигә қоюп Униңға хошамәт билән:

- Әгәр Сән Худаниң Оғли болсаң, төвәнгә сәкригин, чүнки мундақ йезилған әмәсму: «У Өзиниң периштәлиригә Сән тоғрилиқ әмир қилиду вә улар Сени қоллирида тутувалиду, Сениң путлириң ташқа тәгмәйду», - дәп ейтиду.

Рәб Әйса Муқәддәс Китапни бурмилап сөзлигән аздурғучи билән сөз талашмиди. У Муқәддәс Китапниң сөзлири билән мундақ җавап бәрди: «Пәрвәрдигар болған Худайиңни синимиғин».

Шуниң билән шәйтан өзиниң мәхситигә еришәлмәй Әйсадин кәтти.