Бабил мунариси

Топандин кейин Нуһниң оғуллири Сам, Һам вә Япәттин нурғун пәрзәнтләр билән нәвриләр туғулди. Әнди адәмләр топандин кейин бурунқидәк узақ яшимайдиған болди. Әгәр Нуһ 950 жил яшиған болса, униң оғли Сам 600 жил яшиди, Самниң оғли болса 430 жил яшиди.

Лекин Нуһниң әвлатлири һәқәйәргә тарап кетишидин бурун бир иш йүз бәрди. Шәриқтин адәмләр Бабилдики бир түзләңликкә кәлди. Улар һәммиси бир тилда сөзлишәтти. Бир күни улар план қилип бир-биригә мундақ деди: - Келиңлар, кесәкләрни ясап, андин уларни от билән көйдүрүп, асманға йәткидәк қилип бир шәһәр билән мунарә салайли. Шундақ қилип, биз йәр-йүзидә тарқилип кетиштин бурун, даңқимизни чиқиралаймиз.

Уларниң қәлбиниң мәғрурлиғини көргән Пәрвәрдигар:

- Мән инсанларға чүшүп уларниң тилини қаймақтуруветәй, шунда улар өзиниң һакавур һәм әхмиқанә планини әмәлгә ашуралмайду, - деди.

Шу ан адәмләр бир-бирини чүшәнмәйдиған болди, сәвәви улар һәрхил тилларда сөзләп кәтти. Бу сәвәптин һәммә нәрсә қалаймиқан болуп, улар мунарини қурушни тохтатти.

Шуниң билән Пәрвәрдигар уларни пүтүн зиминға тарқитивәтти, шуңа бу шәһәр Бабил дәп аталди; Бабил дегән «қалаймиқанчилиқ» дегән мәнани билдүриду.

Шундақ қилип, Бабил мунарисиниң вақийәси топандин кейин пәйда болған һәрхил тилларниң келип чиқишини билдүриду.