Худаға аталған ибадәтхана

Пәрвәрдигар Сулайманниң һөкүмранлиғини берикәтләйду. Исраил дөлити билән әтраптики барлиқ хәлиқләрниң арисида течлиқ-аманлиқ һөкүм сүрмәктә еди. Лекин Сулайманниң алдида Пәрвәрдигарға атап ибадәтхана селиш вәзиписи болған еди, бу вәзипә болса һәргизму кичик әмәс еди.

Исраиллиқларниң Мисирдин чиққиниға төрт йүз сәксән жил болғанда, улар ибадәтхана селишқа киришиду. Сулайман дадиси Давутниң ағиниси Һирам билән течлиқ келишимини түзиду. Һирам болса Тир вә Сидон зиминлириниң падишаси еди. Улар мундақ дәп келишиду: Һирам қурулушқа керәклик болған қиммәт-баһалиқ яғач билән ташларни тәминләйду, Исраил болса униңға йемәклик тәминләйду. Ибадәтхана йәттә жил селиниду. Ибадәтхана Давут өзиниң аләмдин өтүшиниң алдида Сулайманға қалдурған план бойичә селиниду. Ибадәтхана селинидиған җайниму Давут көрсәткән болуп, бу Мория теғи еди. Бу тағда бурун Ибраһим Худаға өзиниң садиқлиғини дәлиллигән, Худа болса Исһақниң һаятини сақлап қалған.

Ибадәтхана асасий икки қисимдин ибарәт болуп, улар «Муқәддәс җай» вә «Әң муқәддәс җай» дәп атилатти. Келишим сандуғи қоюлған Әң Муқәддәс җай башқа бөлмиләрдин жуқур қурулған болуп, бу җайни Муқәддәс җайдин қелин пәрдә айрип туратти.

Әң Муқәддәс җайда деризә йоқ болған, сәвәви бу җай қараңғу болуши керәк еди. Муқәддәс Китап бу җайни «Худа билән сөзлишидиған җай» дәп атайду, сәвәви бу җайда Худа Өзи көрүнмәйдиған һалда моҗут болған.

Ибадәтхана пүткәндин кейин, у тәнтәнилик муқәддәслиниду. Сулайман Пәрвәрдигарниң келишим сандуғини ибадәтханиға йөткәш үчүн, барлиқ ақсақалларни вә Исраил қәбилилириниң рәһбәрлирини жиғиду. Роһанийлар келишим сандуғини Әң Муқәддәс җайға елип кәлгәндә, булут чүшүп пүтүн ибадәтханини толтуриду.

Буниң арқилиқ Пәрвәрдигар бу иштин болған разилиғини вә Өзиниң Исраил хәлқиниң арисида моҗут екәнлигини көрситиду!

Әнди Сулайман ибадәтханини пүтүрүш үчүн қилинған ишниң Пәрвәрдигарни рази қилғанлиғини ениқ билиду.