Сион теғидики келишим сандуғи

Давут Худа униңға вәдә қилғандәк ахири падиша болди. У Бәйтләһәмдә туғулуп шу йәрдә қой бақти, лекин падиша болғандин кейин Йерусалимда туридиған болди.

Йерусалим тәсәввур қилғусиз чирайлиқ шәһәр болған. Бу шәһәр бир нәччә тағниң үстидә җайлашқан болуп, бу тағларниң бири Сион дәп атилатти. Бу тағда Давут өзи үчүн бир сарай салди. У Худани интайин яхши көрәтти, шуңа Худаниң сандуғиниң униң йенида болушини халатти. Шундақ қилип вақти кәлгәндә, Давут сандуқни елип келиш үчүн йолға чиқти.

Бир топ роһанийлар Давут билән биргә маңиду. Хәлиқму падишаға әгишип һәрхил әсвапларни чалиду: чилтар, канай, нәй, нағра вә зәбур күйлири. Хәлиқ бу әсвапларни челип Худаға мәдһийәләрни ейтатти. Давут өзи чилтар чалғач, башқа әсвапларни челиватқан вә нахша ейтиватқанлар билән биллә маңиду. Уларниң арқисида болса роһанийлар Худаниң сандуғини көтирип маңиду.

Бу көрүнүш немә дегән чирайлиқ! Адәмләрниң Худани мәдһийиләватқанлиғини аңлаш немә дегән есил! Халайиқ топ-топи билән уларни қарши елишқа чиқти. Улар Давутниң чилтарни челип Худани улуқлиғанлиғини аңлиди. Давут бу күни немә дегән бәхитлик болған һә!

Улар келишим сандуғини Сион теғиға елип чиқиду. Бу тағниң чоққисида там қурулған болуп, у йәрдә йәнә дәрваза бар еди. Халайиқ дәрвазиға йеқинлашқанда, падиша билән сандуқни киргүзүш үчүн баш дәрвазиләр ечилиду. Давут пәрдиләр билән йепилған сандуқни қоюш үчүн алаһидә җайни алдин-ала тәйярлашни буйрийду. Нахшичилар «Рәбни мәдһийләңлар!» дегән тәнтәнилик мәдһийәни ейтиду. Бу мәдһийәни Давут өз вақтида язған еди. Шу күни падиша Сион теғида Худаға қурванлиқларни әкелиду вә Исраил хәлқини берикәтләйду.

Давут Худаниң сандуғиниң әнди униң сарийиниң қешида екәнлигидин хошаллинатти. Һәркүни нашичилар сандуқниң алдида саз чалатти вә тәнтәнилик мәдһийә нахшилирини ейтатти.

Падиша Давут һәрқачан сарайида болматти, сәвәви у филистийәликләр вә Исраил хәлқиниң башқа дүшмәнлири билән көп җәң қилатти. Лекин Худа униңға вә униң хәлқигә дүшмән үстидин ғалибә қазинишқа ярдәм бәргәндә, у һәрқетим Сион теғиға қайтип келип, Худаға ғалибә қазанғанлиғи үчүн рәхмәт ейтатти.