Иордан дәриясидин өтүш

Таң сәһәрдә Йошува Исраил хәлқи билән Иорданға қарап чолға чиқти. Улар дәрия бойида бир дәм арам елип, дәриядин өтүшкә тәйярланди. Йошува хәлиққә, «Силәр авал муқәддәслинишиңлар керәк, сәвәви Пәрвәрдигар мөҗүзә яратмақчи», дәп ейтиду.

Әтиси Пәрвәрдигар Йошуваға:

- Бүгүн Мән хәлиққә Мусаға қандақ ярдәм қилған болсам, саңиму шундақ ярдәм қилидиғанлиғимни көрситимән. Сән роһанийларға мундақ дәп ейтқин: силәрниң путлириңлар Иордан дәриясиниң сүйлиригә киргән һаман, келишим сандуғи билән бир орунда тохтаңлар! – дәп ейтиду.

Шуниң билән Йошува роһанийларға келишим сандуғини елип хәлиқниң алдида меңишни буйриди. Хәлиққә болса Йошува:

- Бүгүн силәр Пәрвәрдигарниң мөҗүзилирини көрүп, араңларда тирик Худаниң бар екәнлигини билисиләр! Келишим сандуғи силәрниң алдиңларда Иорданни кезип өтиду. Һәрбир қәбилидин бирдин адәм таллаңлар. Бу адәмләргә алаһидә буйруқ берилиду!.. Роһанийларниң путлири Иордан сүйигә киргән һаман, су иккигә бөлүниду: бир тәрәптә су худди тамдәк бир орунда жиғилип туриду, йәнә бир тәрәптә болса еқип түгәйду.

Келишим сандуғини елип маңған роһанийлар дәрияға киргәндә, жуқуридин еқип келиватқан су дәрһал тохтайду. Дәрияниң бир тәрипидә йоған су теми һасил болуп, бу йәр роһанийлар турған җайдин жирақ еди. Башқа тәрәптә болса су түгәп кәткичә ақмақта еди. Шуниң билән кәң йол пәйда болди. Роһанийлар келишим сандуғини дәрияниң оттурисиғичә елип келип шу йәрдә тохтиди. Барлиқ исраиллиқлар Иорданни қуруқлуқ билән кечип өтти.

Андин Пәрвәрдигар хәлиққә мундақ буйруқ бәрди: он икки Исраил қәлибисидин бирдин әр киши чиқип, дәрияниң тегидин, йәни роһанийлар келишим сандуғи билән турған йәрдин бирдин таш елип, хәлиқ тохтиған йәргә қойсун. Йошува Навин йәнә он икки ташни елип, роһанийлар келишим сандуғи билән турған йәргә әсләтмә қурди.

Пүтүн хәлиқ Иордандин өткәндин кейин, уларниң арқисидин Пәрвәрдигарниң сандуғини көтүрүп турған роһанийларму дәриядин чиқиду. Улар Иордандин чиққан һаман, сулар қайтидин орниға чүшүп пүтүн дәрияни толтуриду. Пәрвәрдигарниң бу мөҗүзисидин һаң-таң болған хәлиқ Ериха шәһириниң шәриқ тәрипидики Гилгал дегән йәрдә олтирақлишиду. У йәрдә Йошува Навин вә он икки әр киши дәриядин чиқарған он икки ташни тикләп хәлиққә:

- Силәрниң пәрзәнтлириңлар атилиридин: «Бу ташлар немини билдүриду?» - дәп сориғанда силәр уларға: «Бу йәрдә Иордан дәриясиниң сүйи Пәрвәрдигарниң келишим сандуғиниң алдида иккигә бөлүнди дәңлар», дәп ейтти. Бу ташлар Исраил хәлқи үчүн мәңгү әсләтмә болиду. Уларға қарап дуниядики барлиқ хәлиқләр, Пәрвәрдигарниң қудрәтлик екәнлигини билип йетиду! Буниң арқилиқ силәрму бир өмүр Пәрвәрдигар Худадин әйминидиған болисиләр! – деди.