Павел база Сила

Ооң мурнунда христианнарны көөр хөңнү чок болгаш, истеп-­сүрүп, хоругдап турган Савл ам Буянныг Медээниң идекпейлиг тарадыкчызы болу берген. Ооң канчаар өскерли бергениниң бадыткалы кылдыр Савлды колдуунда Павел дээр апарганнар. Ол ышкаш чаңгыс үзел-бодалдыг кижилер-биле Европага безин аян-чорук кылып чораан. Павел каяа-даа келгенде баштай-ла иудейлер-биле ужуражыр аргазын дилеп, оларның чыглыр синагогалары чок болганындан субботаларда ажык дээр адаанга чыглыр черинче баар турган. Бир-ле ындыг чыыш соонде аңаа бай-шиник кеттинген херээжен чедип келгеш, аңаа Иисустуң дугайында таптыг тайылбырлап бээрин дилээн. Ооң ады Лидия.

Олар дыка үр чугаалашканнар. Сөөлүнде Лидия:

— Бурган мени Бодунуң төлү кылдыр хүлээп аар кылдыр мээң-биле тейлеп көрүңерем. Ооң соонда сугга суктуруп алган болзумза — дээн.

Сугга суктурган соонда Лидия оларны бажыңынче чалаан. Ынчалза-даа Павел-биле ооң кады чораан эжи Сила ооң бажыңынга үр болбааннар. Каш-ла хонганда хоорай шииткекчизи оларны кара-бажыңнап каан. Хоорайның чамдык чурттакчылары гректер-биле римчилер аразынга иудейлерниң суртаал кылып турарынга ажынып турган. Павел база Силаны камерага суккаш, оларның буттарын аар доорбаш ыяшка чыпшыр демирлээш, кара-бажыңның иштики өрээлинге шоочалап каан. Оларда турар хамаанчок шимчээр безин арга чок.

Ындыг-даа болза ол ийи суртаалчылар Бурган оларның-биле кады деп билип турган. А Бурган оларны быжыктырып, сорук киирип турган.

Павел база Сила өөрүшкү-биле Бурганны алгап-­мактап ырлажып турганнар. Эгезинде шала оожум, ооң соонда улам-на дыңзыдыр ырлажып орда чанында камераларда улус база дыңнап каан. Кара-бажыңда хирезинде өөрүшкү-биле ырлажып турарын дыңнааш, херектээннер кулактарынга бүзүревейн турганнар.

Хенертен оларның үнүнге өске дааш холужа берген: диңмирээшкинниң үзүктелип турар даажы ышкаш. Ооң соонда бүгү чүве сириңейни берген. Чер шимчээшкини! Кара-бажың чайганып турза-даа, шуут буступ дүшпээн. Павел база Сила кара-бажың өрээлиниң дөжек таваанда даш чыла бергенин эскерип каан соонда оларның холдар, буттарында кинчилер база чештине берген. Дашкаар үнер эжик база ажык болган.

Чер шимчээшкининден кара-бажың даамалы оттуп келген. Тура халааш көөрге эжиктер ажык.

— Хоругдаттырганнар шупту дезе бергеннер-дир. Мени ам ат кылыр. Ооң орнунга бодум өлү берейн — деп бодай берген.

Хылыжын ушта соп эккелгеш, бодун өттүр шанчар деп турганын көрүп кааш, Павел алгырыпкан:

— Ындыг чүве кылба! Бис шупту мында бис!

Кара-бажың даамалы кымның-даа деспээнин бүзүреп көргеш, Павел база Силаны куспактапкан. Бо улустуң Бурганы боларны хостаар дээш чер шимчээшкини болдуруптар болганда, ол ёзулуг шын Бурган-дыр.

— Дээргилерим, камгалалды алыр дээш, мен чүнү канчаар ужурлуг мен?

— деп, айтырган.

— Дээрги Иисус Христоска бүзүре, ынчан камгалалды алыр сен! — деп Павел харыылаан.

Оон ол оларны бодунуң бажыңынче чалаарга, олары күзелдии-биле кады чорупкаш, Иисустуң дугайында кончуг тодазы-биле тайылбырлап бергеннер. Иисустуң чүгле эки чүүлдер кылып турганын, база ажыл-херээ сөс-домаа-биле кажан-даа карышпайн турганын көргеш, улус Иисус шынап-ла Бурганның Оглу-дур деп бүзүреп турганын чугаалааннар. Рим солдаттарның Иисусту буруу чок черге крестке канчаар хере шаап өлүргенин база чугаалааннар. А Павел-биле Сила боттары истеп-­сүрүүшкүннүг хилинчекке таварышса-даа чүге элдепсинип кайгавайн турарын чугаалааннар. Дээрги Бурганны өлүрген улус, оларны чүге Оон дээре көөр деп? Кара-бажың даамалының өг-бүле улузунга Иисус бүгү кижилерниң бачыдын Бодунче ап, кижилерни Бурган-биле катап эптештирер дээш крестке өлгеш, оон катап дирлип келгенин база Ыдыктыг Сүлде дамчыштыр Аңаа бүзүрээн кижи бүрүзүнге камгалалды Ол бээр деп чугаалаарга:

— Мен база Иисус Христоска бүзүреп тур мен — деп даамал чугаалаан.

— Мени база Бодунуң төлү кылдыр хүлээп аарын Оон дилээйн!

— Бир эвес Бурган херээженнерни база хүлээп алыр болза, мен база Аңаа бараан болуксап тур мен. — деп кадайы аңаа каттышкан.

— Ынчанмайн канчаар, Буянныг Медээ херээженнерге база хамааржыр! Бичии уругларга база хамааржыр! Силерниң хоорайыңарда христиан апарган бир херээжен база бар болгай — деп Павел чугаалаан.

Чугаалашкан соонда ол өг-бүле шупту Бурганга бүзүрээниниң демдээ кылдыр сугга суктуруп алганнар.

Бажыңның ээзи-биле кады чемненгеш, хүн үнүп кээрге Лидияның бажыңынче далажыпканнар, чүге дизе Лидияның олар дээш хөлзеп турарын билип турганнар. Аңаа келгеш Бурган оларны канчаар кайгамчыктыг онза хостап, камгалаанын база кара-бажың даамалының бүгү өг-бүлези-биле Бурганга бүзүрей бергенин чугаалап бергеннер.