Павелдиң Римче аян-чоруу

Павел ооң кады чораан эштери-биле чедип кээрге Иерусалим церковунуң өөрүп амырап турарын чүү дээр! Бурган Павелдиң бараан болуушкунун дамчыштыр өске чоннар улузунга чүнү кылганын чугаалап бээрге, Ооң сөзүнүң кайы хире дээштиин магадап Бурганны алдаржыдып турганнар. Ынчалза-даа оларның өөрүшкүзү үр болбаан.

Иерусалимге келгеш чеди хонганда, Павел Бурганга өргүл кылыр дээш, Бурган өргээзинге чедип келген. Аңаа турган иудейлер Павелди көргеш, оларның дыңнаар безин хөңнү чок турганы Иисус Христостуң өөредиин суртаалдаар кижи-дир бо деп танып кааннар. Павелди сегирип алгаш, оларның хоойлузунга удур чүве өөредип турар, база өске чоннар улузун эдертип эккелгеш Бурганның өргээзин бужартаткан деп алгыржы бергеннер. Хорадаан иудейлер Павелди өлүрер дээш, дашкаар үндүр сөөртү бергеннер, чүге дээрге Бурганның өргээзиниң иштинге ындыг чүве кылып болбас ужурлуг. Рим шериг баштыңы Клавдий Лисий бүдүн хоорай хөлзеп турарын көргеш, Павелди кинчилеп алгаш шивээже апаарын дужааган. Орукка ол чонга сөс чугаалаар чөпшээрел дилеп алгаш, Дээрги Иисусче канчап ээлгенин болгаш бачыттары дээш өршээл алганын иудейлерге чугаалап берген. Олар эгезинде кичээнгейлиг дыңнап турганнер, а Бурган ону өске чоннар аразынга (язычниктерге) база сурттаалдаарын даасканын чугаалаарга, улуг кырыш эгелээннер. Павелди ындыг кижи дириг чорбас ужурлуг деп алгыржып турганнар. Хоругдаткан кижиниң сөстери чоннуң килеңин улам кедередип турарын көргеш, Клавдий Лисий Павелди шивээже апаар айтыышкын берген. Ол шериглеринге ону эриидеп тургаш, байысаарын дужааган. Ынчаарга Павел:

— Рим күрүнезиниң хамаатызын суд-даа чокка эттеп-эриидээрин кым чөпшээрээн чүвел? – дээн.

Римчилер кайгап корга бергеш, ону байысаавайн барганнар, ынчалза-даа кинчизинден адырбааннар.

Эртенинде Павелди Иудей Дээди чөвүлел мурнунга тургузупкан. Сайгарылга үезинде ийи өжээннешкек партиялар аразында маргылдаа үнген: бир тала ону буруудадып, а өске тала: “Бо кижиде багай чүү-даа көрбейн тур бис” — деп алгыржып турганнар. Хөлзээзин кежээлеп, иудейлер Павелди долгандыр бүзээлей бергеннер. Клавдий Лисий оларның Павелди үзе-чаза соп кааптарындан сезингеш, шериглеринге ону шивээже аппаарын дужааган.

А дүне Павелге Дээрги Иисус чедип келгеш:

— Павел, дидим бол, чүге дээрге Мээң дугайымда Иерусалимге херечилеп турганың дег, Римге база херечилээр сен – дээн.

Төнмес-батпас сайгаржылгалар база иудейлерни каш катап Павелди өлүрер деп шенээн соонда, ону шиидери-биле император судунче чорудар деп шиитпирлээннер.

Иисус Христос дугайында Буянныг Медээни императорнуң бодунга чедирери-биле Павел Римче чоруптары ол. Бодунуң планын Бурган ынчалдыр күүсеткен.

Чер Ортузу далайга ол үеде аажок күштүг шуурганнар болур турган болгаш, бичии ыяш корабльге эжиндирип чорууру дыка айыылдыг турган. Ол дугайын далайжыларга Павел сагындырарга, олары ону тооп дыңнаваан.

Бир хүн ёзулуг күштүг шуурган эгелээн. Бедик чалгыглар корабльди ол-бо талазынче аай-дедир октап турган. Ону камгалаар дээш, чүъктүң хөй кезиин сугже дүжүр октапканнар. Ынчалза-даа байдал оон-даа дорайтаан. Шак ынчаар каш хонук уламчылап келгенде, кижилер дириг арттарынга чөгенип эгелээннер.

Ынчан Павел оларга шуурган өттүр дыңзыг алгырган:

— Эш-өөр! Коргуп, тура-сорууңар чидирбеңер, силерден кым-даа өлбес, чүгле корабль чуурлуп каар. Чүге дизе мээң бараан болуп чоруурум Бурганның Ангели бо дүне келгеш: “Кортпа, Павел! Сен императорнуң мурнунга турар сен!” – диди.

Шуурган эгелээнинден бээр он дөрт хонук эрткенде далайжылар черни көрүп кааш, эрикче эжиндирип шыдаваан. Корабль сыык черге элезинге олурупкан болгаш кыдыглары чалгыглардан буступ каан. Ынчалза-даа кижилер дириг арткан болгаш, дөгере эрикче үнүп келгеннер.

Бурган Бодунуң Сөзүн ээлээн. Кым-даа сугга дүжүп өлбээн, безин балыгланмаан-даа. Римге Иисустуң ады алдаржызын дээн Ооң планы ам бүдер.

Павелдиң Римге кайгамчыктыг арга-биле чедип кээрин Бурган болдурган. Иисус Христоска бодунуң бүзүрелин императорнуң мурнунга херечилээр арганы бергени дээш, Павел Дээрги Бурганга четтиргенин илереткен.

Павел Римче херектээн эвес, а Иисустуң херечизи — Дээрниң Хаанының элчини бооп келген.