Пётр кара-бажыңда

Рим император Гай Цезарь Улуг Иродтуң оглунуң оглу Ирод Агриппаны Иерусалимге база Палестинаның улуг кезиинге хаан кылдыр томуйлап каан.

Ооң чагыргазының үезинде христианнарны истеп-­сүрүп, улуг кызагдаашкын эгелээн. Иудей баштыңнар база оларның талалакчылары элчиннерни база Иисустуң шупту өөреникчилерин көөр хөңнү чок. Ирод ону билир. Оларны бодунче көрүндүрүп аар дээш, ол Иоанның акызы Иаковту өлүрерин дужааган. Иудейлер ону өөрүшкүлүү аажок таарзынып хүлээп алганнар, ынчангаш Ирод Пётрну база тудуп хоругдаар дужаал үндүрген.

Ону кара-бажыңнап кааш, он алды шеригге дүн-хүн чок кадарар дужаал берген.

Пётр элчинни шаажылаар хүнүн база айтып каан, ынчалза-даа церковь Пётр дээш Бурганга соксаал чок тейлеп, дилеп турган. Ол өйде Иерусалимге өске элчиннер турбаан. Олар Иродтуң истеп-­сүреринден чаштынып, хоорайдан чорупкан турганнар. Ынчалза-даа элчиннерден аңгыда Иерусалимге Христостуң дыка көвей өөреникчилери артып каан.

Пётр дээш Бургандан дилег кылыр дээш, Иоанның авазы Марияның бажыңынга оларның чыглып турганы ол. А ол үеде Пётр кара-бажыңга шөлээн удуп чыткан. Оон чанынга үргүлчү ийи шериг турган. Оон аңгыда кара-бажыңның иштики болгаш даштыкы эжиктериниң чанынга, база дашкаар кудумчуже үнер эжик чанынга таңныылдар турган. Пётрнуң дезе бээр харыы турган бе?! Чок. Ол дезерин безин оралдашпаан-даа.

Ындыг-даа бол кымның-даа манавааны элдеп чүүл болган. Хенертен Бурганның Ангели Пётрнуң мурнунга чедип келген, а кара-бажың ишти чырый берген. Пётр шөлээн удуп чыткан, ынчалза-даа Ангел ону быктынче идип, оттурупкаш:

— Дүрген тур! — дээн.

Ол үеде ооң холундан кинчилер уштунуп кээп дүшкен. Ангел Пётрга идик-хевин шуптузун кедип аарын дужааган. Ол өйде шериглер аажок ханы удуп чытканнар. Оон Ангел:

— Мээң соомдан чорувут! –дээн.

Пётр Ооң соондан кара-бажыңның ажык эжии-биле чорупкан. Удаан таңныылдарның аразы-биле Ангел Пётрну демир эжиктерниң чанынга эккелген. Эжиктер оларның мурнунга боттары-ла ажыттына берген. Олар кады хоорайже кирип келгеш, элээн бар чорда, Ангел чиде берген.

Петр чүү болганын билип кааш:

— Мен ам ылап-ла билдим, мени өлүрер деп турган Иродтуң болгаш Иудейлерниң холундан мени хостаар дээш, Бурган Бодунуң Ангелин чоруткан-дыр — деп чугаалаан.

Оон Пётр ону дээш Бурганга тейлеп турар бажыңче чорупкан. Пётр соктаптарга чалча кыс үнүп келгеш, Пётрнуң үнүн танып кааш, амыраанындан хаалганы ажыдарын уттупкаш, бажыңче кире халааш:

— Хаалга артында Пётр тур — дээрге өөреникчилери бүзүревейн, ол Бурганның камгалазын дээш чорудупкан Ангели боор деп турганнар.

А даштын Пётр хаалганы соктавышаан. Хаалганы ажыдыпкаш, Пётрну көрүп кааш өөреникчилер кедергей кайгааннар. Оларның өөрүшкүзүн чүге деңнээр! Дайзыннары дыңнап калбазы-биле Пётр оларга “Ыытташпаңар” деп имнээн. Олары оожургай бээрге кара-бажыңдан Бурган ону канчаар хостап алганын Пётр чугаалап берген.

Оон Ирод ону тып шыдавазын дээш Пётр Иерусалимден чорупкан.