Иисус Христостуң Иоаннга ажыдыышкыны

Иисус Христостуң өөреникчилериниң хөй кезии Буянныг Медээни суртаалдап турганы дээш хилинчектеттирип, өлүртүп турза-даа төнчүзүнге чедир Бурганга шынчы болуп артканнар. А ол элчиннерниң чүгле чаңгызы кырыгыже чедир чурттаан, тозан харлыг тургаш безин ол Ефесте христиан ниитилелдиң кежигүнү турган. Ол Иоанн-дыр. Христоска бүзүрели дээш истеп-­сүрдүрүп турган-даа болза, ону өлүрбейн Чер Ортузу далайда Патмос ортулукче шөлүпкен. Ол ортулуктуң чурттакчылары чүгле херектээннер болгаш оларның таңныылы, ол-ла. Аңаа аажок шыпшың турган болгаш, Бурган Иоанн-биле чугаалажып турган. Ол Иоаннга Иисус дээрге Хаан-дыр, христианнарны чер бүрүзүнде истеп-­сүрүп турар-даа болза, бүзүрээннерниң салым-чолу Ооң холунда дээрзин көргүскен.

Бурган бо делегей төөгүзүнүң төнчүзүн Иоаннга чурукта дег көргүскен. Ол он ийи көстүүшкүн болган, а Ооң дугайында Иоанн Библияның Ажыдыышкын деп түңнел номунда бижээн. Сөөлгү көстүүшкүнде Бурганның Ангели, Ооң чонунга белеткеп кааны дээрниң алдарын көргүскен.

Иоанн элчин Бурганның болгаш Хураганның дүжүлгезинден үндүр агып чыдар кедергей арыг кылаң амыдырал хемин, база чаа черни, чаа дээрни, ол хемниң кыдыында өзүп турар амыдырал ыяжын көрген.

Дээрниң ол кайгамчыктыг оранынга ам кым-даа бачыт кылбас, чүге дээрге Иисус Христос бачытты тиилээн. Бачыттың дүнү-даа, бүзүрел чок чорук-даа, өлүм-даа ам катап келбес, чүге дээрге Дээрги Бурган оларны узуткап каар. А камгалалды алган болгаш Иисуска бүзүрээннер, Дээрниң Чагыргазынга Ооң-биле кады кезээ мөңгеде хааннаарлар.

Ангел Иоаннга:

— Көрген база дыңнаан чүвең шуптузу алыс шын-дыр ол — дээн.

Ол көстүүшкүннерниң соонда Дээрги Иисус Боду Иоаннга чугаалаан:

— Мен дээрге Альфа база Омега-дыр мен, баштайгызы база сөөлгүзү, эгези база төнчүзү… Мен Давидтиң дазылы, үре салгалы-дыр мен, эртенги чырык сылдыс-тыр мен! — дээш, Дээрги ооң-биле байырлашкан.

— Аминь! Ийе, Чедип кел, Дээрги Иисус! — деп Иоанн харыылаан.