Тавифаны диргискени

Бир катап Петр элчин Иерусалимден чээрби километр черде турар тейлер аразында суурже чорупкан. Ол суурнуң адын Лидда дээр. Ооң чурттакчыларының хөй кезии Дээрги Иисуска бүзүрээр, ынчангаш Петр олар-биле ужуражып, чугаалажырынга дыка ынак.

Еней деп аттыг бир кижи чартыктап аар аарааш, сес чыл иштинде, чыткан дөжээнден турбаан. Пётр аңаа:

— Еней! Сени Иисус Христос экиртип тур; дөжээңден туруп кел! — дээн.

Ол доп-дораан туруп келген. Пётр ону “Мен сени экиртип каар мен” дивээн, чүге дээрге чүгле Христостуң күжү экиртип шыдаарын ол билир. Енейниң аарып чытканын билир хөй улус ону сонуургап, көрүксей бергеннер. А ол шынап-ла каң-кадык апарган боорга, дыка хөй кижилер Бурганга бүзүрей берген.

Лиддадан үжен киломерт черде Иопия хоорай турган. Лидданың чамдык чурттакчылары аңаа баргаш, Пётр элчинниң чартыктап аараан кижини Иисустуң ады-биле экиртип, катап күш киирип каанын чугаалааннар.

Ону дыңнааш чурттакчылар Пётр элчинни чалап чедип келгеннер, чүге дизе ол үеде оларның церковунга хөй-ле буянныг ажыл херектерни кылып турган бир херээжен кижи аарааш, өлүп каан чүве-дир. Ооң адын Тавифа дээр турган. Ядыы кижилерге аажок дузалаар, ынчангаш чон ону дээш аажок качыгдап, ыглажып турган.

Өңнүктери ону хөөржүдеринге белеткенип алган-даа болза, ажаар бетинде Пётрну оларга чедип кээрин дилээр деп шиитпирлээннер. Пётр Иопияга чедип келгеш, Тавифаның дузалажып чорааны херээженнер чыылган өрээлге кирип келген. Кээргенчиг херээженнер өлген кижиниң оларга даарап берген хептерин ыглашпышаан, элчинге көргүзүп турганнар. Тавифа оларга аажок ынак турган болгаш, демгилери база ындыг турганнар.

Пётр оларның шуптузун өрээлден үне бээрин дилээн. Кажан шупту улус өрээлден үне бээрге, ол дискек кырынга олуруп алгаш, Бурганга чалбарып тейлээш, өлген кижиге чугаалаан:

— Тавифа, туруп кел!

Чыткан херээжен карактарын ажыдыпкаш, Пётрну көрүп кааш, олуруп алган. Пётр олче холун сунуп, турарынга дузалашкан. Оон чүү болурун четтикпейн, даштын манап турган улусту кыйгырыпкаш, дирлип келген Тавифаны эгидип берген. Оларның өөрүшкүзүн чүге деңнээр!

Пётрнуң дилээ-биле Бурганның кылганы бо болуушкун шупту кижилерге дыңналы бээрге, дыка хөй кижилер Бурганга бүзүрей берген.