Эммаус баар орукка ужуражылга

Иисустуң ийи өөреникчизи Иерусалимден Эммаус суурже качыгдалга бастырган муңгарап кел чораан. Олар сөөлгү хүннерде болган бүгү чүвени аразында сайгаржып чорааннар. Олар Иисусту алдарлыг улуг баштыңчы апаар деп бодап, Ооң соондан эдерип чоруп турганнар. А ам Ол өлүг… Ындыг-даа болза хоорайда Ону дирлип келген деп чугаа база тарап турар… Ол медээ оларны шуут кайгадып турар.

Аразында чугаалажып чорда, оларга бир чорумал кижи каттыжып кады чорупканын эскербээннер. Ол баштай ыыт чок оларның чугаазын дыңнап чорааш, айтырыг салган:

— Силер чүү дугайында чугаалажып чорууруңар ол? Чүге муңгаргай силер?

— Бо хүннерде Иерусалимге чүү болуп турганын билбес кижи чаңгыс силер боор силер аа?

Хоорайга сөөлгү хүннерде чүү болганын олар чугаалап дооскаш, хараадааны аажок оруун ыыт чок уламчылап чорааннар. Иисус өөреникчилерни оожум дыңнааш, ооң соонда Боду чугаалаан:

— Канчап черле Ыдыктыг Бижилгеде чүнү бижээнин билбес болганыңар ол? Билир турган болзуңарза, ол бүгү болур деп билир турган силер. Христос, Бурганның Оглу бүгү кижилерниң бачыды дээш хилинчектиң өлүмүн алгаш, оон дирилгеш Бурганның алдарынче кирер. Ыдыктыг Бижилгеде ол дугайын Моисейни, Ыдыктыг Ырларны, база медээчилерни дамчыштыр хөй катап чугаалаан.

Ол Бижилгениң дыка хөй үзүндүлерин шээжи-биле чугаалап берген. Ооң хөй кезиин өөреникчилер билир турган, ындыг-даа болза, азы шын эвес билип турганнар, азы Ол баш удур чугаалаан сөстерге бүзүревээни ол, азы анаа уттугулапканы ол чүве, а ам оларның карактары ажыттынып келген. Шынап-ла! Бижилге ёзугаар болур ужурлуг чүве болган-дыр! Оларның Дээргизи база Башкызы иудейлерни Рим императорнуң чагыргазындан хостаар дээш эвес, а бүгү кижилер дээш өлгеш, бачыттарындан камгалап, хостаар дээш келген. Ол душ бооп өлбээн, а катап дириг амы-тынныг келир дээш өлген. Канчап черле олар ону билбес болганы ол!

Танывазы кижини дыңнап чораан үезинде оларның муңгараары чидип турган. Ындыг-даа болза Кым олар-биле кады чоруурун ам-даа билбээннер.

Эммаус суурга чоокшулап келгеш, олар-биле кады артып калгаш, чемненип хонуп аарын Аңаа сүмелээннер. Танывазы Кижи артып калган. Кежээки чем болу бээрге олар-биле кады чемненип олурупкаш, Ол хлебти алгаш, ол дээш Бурганга өөрүп четтиргеш, үзе тырткылааш, оларже сунган.

— Иисус ындыг чүве ийин. Элдептиин аа! — деп боданып удур, дедир көрүнгенннер.

Ам-на карактары ажыттынып келген: оларның баарында Иисус! Баштай танывааны Кижизи — ында кандыг-даа маргылдаа чок — Ол Иисус-тур!

А Иисус хенертен көзүлбейн барган. Канчап Ону танывайн барганнары ол! Ол орук ара бистиң-биле чугаалажып чорда, база Бижилгениң утказын биске тайылбырлап чорда, чүректеривис хып чорду чоп! Иисус чанында чок-даа болза эжишкилерниң ам муңгаралы читкен. Иисус дириг! Улуг өөрүшкүзүн олар арткан эштери-биле ол-ла хүн үлежир деп шиитпир кылгаш, ол-ла дораан Иерусалимде Иисустуң өөреникчилери чыглыр бажыңынче дедир ээпкеннер.