Бүзүрел чок Фома

Дээрги Иисус өөреникчилеринге кээп, балыгларын көргүзүп турда аразынга оларның бирээзи Фома турбаан. Эртенинде олар магадап чугаалаарга, Фома бажын чайып:

– Бүзүревес мен – дээн. – Баштай Ооң балыгларын бодум тудуп көрбээн шаамда, бүзүревес мен.

Фоманы “бүзүревес” деп шолалаар. Чүге дээрге ол:

– Ооң холдарында кадаглардан балыгларны караа-биле көргеш, олче салаам суп шынзыккаш, а Ооң быктында копьё изи балыынче холун сукпаан шаамда, бүзүревес мен! – дээн. Фоманың бүзүрээринге шыырак барымдаа херек болганы ол.

Неделя эрткенде өөреникчилери база катап чыглып келген. Оларның аразынга Иисус хенертен көстүп келгеш:

– Амыр-менди-ле! – деп мендилешкен.

Оон Фомаже холун сунгаш, чугаалаан:

– Мээң балыгларым бо-дур, Фома, тудуп көр даан! Бүзүревес болба, а бүзүрээр бол, Бурганга ынанып чор!

Бодунуң чигзингенинден база чугаалаан сөстеринден ыяткан, ынчалза-даа катап дирилген Камгалакчызынга ынакшылы долган Фома, Иисустуң буттарынга доңгая дүшкеш, сирилээн үн-биле ыыткыр чугаалаан:

– Мээң Дээргим, мээң Бурганым!