Петр базаИоанн чевег-куйда

Хоорайга маң-биле келгеш, Мария Магдалина Иисустуң өөреникчилери — Петр-биле Иоанны тып алган.

— Дээргивисти алгаш барган, Ону ам кайда чыттырып каанын билбес-тир бис.

Иисус ам дириг, Ол өлүглерден катап дирлип келген деп бодал ооң бажынга шуут кирбээн.

Пётр база Иоанн кайгавайн канчаар. Олар Иисусту орнукшуткан черже бүгү далаш маңнажыпканнар. Иоанның кашпагайы аажок болгаш, Аримафей чурттуг Иосифтиң садынга мурнап халып келген. Чевег-куйже кирер эжиин дуглаан дашты чайладып каанын көргеш, ол бакылап көргеш, олче кирбээн. Элдептиин аа! Мөчү чок, чүгле ону орааган шывыгны шевергин бөлүп каан. Иоанн куйнуң аксынга доктаап турган. Пётр маңнап келгеш, база-ла ону көрген: Иисустуң мага-бодун ораап каан турган шывыгны шевергин, а база бажын орааган аржыылды аңгы чанында бөлүп салгылап каан. Марияның даап бодааны дег мөчүнү оорлап апарганы шын турган болза орнукшуткан кижи шывыын кагбас база куй иштин аайлап кагбас турган!

Пётрнуң соондан Иоанн кирип келген. Ол өйде Иоаннга чырык бодал кирген: Иисус дириг! Чевег-куй ынчангаш куруг!

Пётр база Иоанн хоорайже ээп келгеш, арткан өөреникчилеринге херээженнерниң шынзыктырып турганы черинге келгеннер: Иисус дириг, Олар Ону көрген!

Иисустуң хере шаптырганын качыгдап кады ыглажып турганы өөреникчилерниң база Ооң соондан чоруп турган кижилерниң хөй кезии ол өөрүнчүг медээге бүзүреп шыдаваан.