Авраамның Бурганга ынааның хыналдазы

Оларның өг-бүлезинге оглу Исаактың төрүттүнген соонда Авраам-биле Сарра улам аас-кежиктиг апарганнар. Оларның үжелээн Бурганга база бот-боттарынга ынаа аажок. Авраамны дыка бай кижи деп билир бис. Ынчалза-даа ооң чүрээ дың чаңгыс “эртинези” болур оглу Исаак-биле тудуш. Авраам оглунга делегейде чүден-даа артык ынак, а чүгле Бурганга ынаа оон-даа күштүг.

Бир катап Авраамның Бурганга кайы хире ынаан база бүзүрелин Дээрги-­Чаяакчы хынаар деп бодап алган. Ол өйде Авраамга Чаяакчызының үнү дыңналган:

— Авраам! Эр чаңгыс ханы ынак оглуң Исаакты Меңээ өргүп, айытканым дагга эккел.

Ону күүседири Авраамга дыка берге. Ынчалза-даа ол Бурганның күзелин күүседир бодаан, чүге дизе ооң Бурганга ынакшылы дыка ханы күштүг. Авраам одаар ыяш белеткеп алгаш, оозун элчигенге чүдүргеш, оглу Исаакты база ийи чалчазын эдертип алгаш чорупкан. Сарра аалынга арткан. Орук ырак. Олар эртен эртелеп үнүпкеш, орукка бичии када-ла дыштанып чорааш, чедер черинге орай кежээ келгеннер. Исаак кайнаар бар чоруурун дыка биликсээн. “Мынчага чедир ачам чүнү-даа ыыттавайн чоруурун бодаарга, ол чугула херектиг-ле болган-дыр ийин” — деп, Исаак боданган.

Шынап-ла Авраамда чүнү канчаар дээш бар чыдарын чугаалавас чылдагаан бар. Каш хонук бурунгаар Авраамга Бурган халаптыг берге чүве чугаалаан. Авраам ону угаап бодаар безин харыы чок. Херек кырында Бурган Исаакка өлүм күзевээн, а чүгле Бурганның даалгазының утказын билбээн-даа болза, ону күүседиринге Авраам белен бе деп чүвени Бурганга көрүп алыры чугула.

Авраамга ол дугайы билдинмес. Ол чүгле ханы ынак оглун өргүлге бээр ужурлуг апарганын муңгарап чораан. Ол бодалдан Авраам хөңнү баксырап, дыка муңгаргай. Ам канчаар, аар берге-даа болза, Бурганның даалгазын күседирин ол шиитпирлеп алган.

Бедик дагга чедип келгеннер. Исаак сонуургалын тудар харык чок.

— Ачай! Өргүлге кыпсыр ыяжың бар-дыр —дээш, айтырган.

— А өргүп, өртедир хураганың кайыл?

Авраам чаңгыс сөс-даа чугаалаар харыы чок, боостаазын борбак чүве дуй тыртып, харлыга берген.

— Оглум, — деп, арай боорда үнүн үндүрүп Авраам харыы берген. — Өргүп, өрттедир хураганны Бурган Боду хайырлаар.

Даг кырынга үнүп келгеш, олар даш чыып эгелээннер. Авраам даштарны каът-каът салып үндүрүп, улуг өргүл одаа бедигээш белеткеп алган. Ооң соонда Ол Исаакты хүлүп алгаш өргүл бедигээжинге салгаш, холда бижээн оглунуң кырынче көдүрүпкен!

Ол өйде дээрден Дээрги-­Бурганның үнү дыңналып келген:

— Авраам, Авраам!

Кырган оглунуң кырында холда бижээ хевээр, көжүй берген:

— Ийе, Дээргим!

— Оглуңга хора чедирип, хол көдүрбе — деп ол Үн чугаалаан. — Сээң Меңээ дыңнаңгырыңны, Мени дээш чаңгыс оглуң безин бээринге харам чогуңну ам көрдүм.

Авраамга чүректе даш адырлы берген ышкаш сагындырган. Аас-кежикке бүргеткеш, ол өргүл бедигээжиниң баарынга дискекке олура дүшкен. Сирилээн холдары-биле оглунуң хүлүүн чежиптерге. адашкылар куспактажып, качыгдал эвес, а өөрүшкүден ыглажып турганнар.

Ол өйде чоогунда хой мээлээнин дыңнап кааннар. Кыдыынче көрүнгеш Авраам база Исаак мыйыстары-биле шырышта ораажы берген аныяк кошкаржык турганын көрүп кааннар. Олар ону өргүл одаанга эккеп салган. Мурнунда Авраамның “өргүлге өрттедир хураганны Бурган Боду хайырлаар” — деп чугаалаан сөстери ынчалдыр шынзыттынган.

Сагыш-сеткили хосталып, олар дагдан өөрүшкүлүг бадып келгеннер. Исаак адазының холдарындан дыңзыг туттунуп алган, салдынмас. Кижиге база Бурганга ынак болурга кайгамчыктыын адашкылар эки сайгарганнар. А бүзүрээри берге-даа болза, Бурганның кижиге ынакшылын кандыг-даа ынакшыл ажып шыдавас.