Аазаан оглу

Авраам Сарра-биле Ханаан черинге чурттап турганнар. Оларда ажы-төл чок: Авраам 100 хар чоокшулаан, а Сарра 90 хар чедип турар. Бир дуне Авраамга Бурган мынча дээн:

— Дээрже көрем. Чүнү көрүп тур сен?

Дээрде сылдыстар шыпты берген, а оларның хөйүн санаар арга чок. Ынчан Бурган чугаалаан:

— Сен ол дээрде сылдыстар дег эңме тик чок салгалдарлыг болур сен. Олар Ханаан черинге чурттаарлар. Ол чурттан арын-нүүр чок кижилер үндүр ойлаттырар.

Ол үеде Авраамның ажы-төлү чок, ындыг-даа болза ол Бурган аазаан чүвезин күүседир деп бүзүрээн. Арваам шын кылып турары ол, чүге дээрге Бурган кажан-даа чүгле шынын чугаалаар болгаш Бодунуң Сөзүн күүседир.

Бир катап Авраам майгын эжиинге олурган. Дал дүъш чедип турда ол майгынче чоокшулап кел чыдар улусту көрүп каан. Авраам оларга уткуй чеде бергеш, мөгейгеш, чорумал улустуң бирээзинге чугаалаан:

— Дээрги, мээң майгынымче кирип моорлаңар. Силерниң буттарыңар чуп бээр айтыышкындан бергеш, аъш-чемден белеткедиптейн. Күш кирип чемненип, дыштанып алгаш орууңар уламчылаар силер. Үш чорумал Авраамның аайынга кирип, дыштанып алыр деп чөпшээрешкеннер.

Ол кымнарыл деп бодаар силер? Ол Бурганның төлээлекчилери болган. Олар Авраамга дээрден Бурганның медээзин эккелген. Бурган чамдыкта Бодунуң күзел-­соруун дыңнадырда төлээлери Ангелдерин чорудар деп билир силер бе?

Ангелдер майгын чанында хөлегеге олуруп алганнар. Сарра майгын иштинге турган. Авраам Саррага:

— Эң эки далган-биле дүрген хлебтен быжырывыт — дээн.

Авраам боду эң эки молдурганы шилип алгаш хөлечиинге чугаалаан:

— Мону дүрген белеткевит.

Шупту чүвени белеткептерге, Авраам боду чемни аалчыларынга бараалгадып салган. Олар чемненип турар үеде Авраам оларның чанынга ыяш адаанга турган.

Чем үезинде оларның бирээзи айтырган:

— Кадайың Сарра кайдал?

— Ол майгында — деп Авраам харыылаарга, Ангел аңаа:

— Бир чыл болгаш, бо-ла үеде мен сеңээ катап база келир мен, ынчан Сарра оолдуг турар — дээн.

Сарра Ангелдиң чүү дээнин дыңнап кааш, бүзүреп шыдавас болган. Мындыг кыраан назылыг кижи канчап божуур боор, ынчан ол иштинде каттырган.

— Сарра чүге каттырары ол? Ол шынап-ла оолдуг болур. Дээрги Бурганның шыдавас чүвези бар бе?

Аалчылар чоруур дээш тургулап келген. Авраам оларны кезек үдеп кааш, майгыныче ээп келген.

Бурган аазаан сөзүн сактып келген бе? Ынчанмайн канчаар. Бир чыл эрткенде Сарра оолдуг болган. Ону Исаак деп адап алганнар. Авраам база Сарра ёзулуг-ла аас-кежиктиг болганнар. Оглу Исаак дыка дыңнангыр өскен, Бурганга ынаа база хөлчок.

Бурган аазаан сөзүн ынчалдыр күүсеткен. Ол оолдуг болур силер деп Авраам-биле Саррага чугаалаан болгаш, оолду берген. Авраамның Бурганның Сөзүнге бүзүрээни кончуг эки болган, а Бурганга ооң бүзүрээни база өөрүнчүг. Ол дээш Авраам актыг-­шынның кижизи деп санаттырган.

Бурганның аазаашкыннары ынанып бүзүрээринге долузу-биле төлептиг, чүге дизе Дээрги Бурган күчү-күштүг база шынчы, Ооң шыдавас чүвези чок!