Иаковтуң дүжv

Чалчаларының бирээзинден Исавтың Иаковту өлүрер деп белеткенип турганын дыңнааш, Ревекка Иаковту сургап эгелээн:

– Сен моон чоруптар ужурлуг сен. Кырган адаң Авраамның чурттунда мээң акым Лаванче чорувут. Исавтың караанга көзүлбес болзуңза, акың килеңи оожургай бээр. Ынчан сенче мен сөс дамчыдыптарымга ээп кээр сен.

Иаковтуң чоруурун чөпшээрезин дээш, Исаакка чүнү чугаалаарын Ревекка билир.

– Иаков Бурган билбес кадай албас ужурлуг.

Исаак чөпшээрешкен. Хөй чылдар бурунгаар ооң кадайы Ревекка база Авраамның чурттундан келген болгай. Иаков база оон кадай тып алгай-ла.

Исаак Иаковту келдиртип алган.

– Оглум, Иаков, бо черден кадай албайн көр. Аваңның чуртту Харранче чорувут. Ооң кады чурттаар кижиң тып ал. Бурган сени алгап-йөрээзин!

“Ол эки-дир – деп Иаков боданган. – Ачам безин мени чорудуп турда, мен Исавтың караандан ырай бээр мен. Дескен деп безин санаттырбас мен”

Ада-иези база аалдың улузу-биле байырлашкаш, Иаков чорупкан.

Адазындан Иаков чүнү-даа дилевээн. Ол чоруурда бодунга хөлечиктер-даа, хой, өшкү-даа, элчиген безин албаан. Орукче чааскаан үнүпкен.

Ол кажан-даа көрүп көрбээни ырак чуртче кээргенчиг чорумал дег бар чоруур. Сеткил-сагышка муңгаранчыы база аажок. Орукка хонуп алыр майгын-даа, бажың-даа чок, ынчангаш дүн дүжерге бажынга даш сыртанып алгаш чыдып аар. Ол черде араатан аң база көвей, Ынчалза-даа Бурган ону камгалап чораан. Иаковтуң сагыш-сеткилинде аар бодалдарны Ол билир, ынчангаш бир дүне кайгамчык онза дүш берген.

Ол дүжүнде Иаков черден дээрже үнген узун чада көрген. Ол чадалап Ангелдер куду черже бадып, өрү дээрже үнүп турганнар. А дээрде Бурган турган. Ол Иаковка мынча диген:

– Мен дээрге Авраамның, Исаактың чугаалашканы Дээрги-Чагырыкчы-Бурганы-дыр Мен. Удуп чыдар чериңни Мен сеңээ база сээң салгакчыларыңга мөңгеде бээр Мен. Кайнаар-даа баарыңга кады боор мен, камгалаар мен, Иаков.

Иаков оттуп келгеш бодап каан. “Ол анаа дүш эвес, а Бурган Боду бо черде болган-дыр. Ол мээң-биле чугаалашканы ол-дур!”

Иаков сыртанып алган дажын аңаа демдек-тураскаал кылдыр көдүрүп тургузуп каан. Оон соонда ол мөгейип тейлээн:

– Бир эвес Бурган мээң-биле кады болза, каяа-даа чорумда, мени камгалап, аъш-чем база идик-хеп хайырлап чоруур болза, база мен адамның аалынче тайбың ээп кээр болзумза, ынчан Дээрги-Чаяакчы мээң база Бурганым болур. Бүгү назынымда Сеңээ бараан болур мен. Меңээ хайырлааның өнчүнүң онгу кезээн Сеңээ берип өргүүр мен, Бурган.