Иисустуң катап дирилгени

Чер чырыыр мурнуу чарыында, хоорайны долгандыр караңгы имирде качыгдалда каш херээженнер — ийи Мария база Саломия Иерусалимниң чиңге кудумчулары-биле чоруп органнар. Оларның арын-шырайы чоп кончуг муңгаргайыл? Кончуг коргунчуг чүве болган: Иисус ам өлүг! А олар боттарын Ооң мурнунга улуг хүлээлгелиг бис деп санаарлар, ол ам Аңаа мурнукузу-дег бараалгап, Аңаа дузалажып, шыдавас. Ынчангаш Башкызын хүндүлээн демдээ кылдыр сөөлгү катап Ону чаагай чыттыг бальзам-биле Ооң тын чок мага-бодун чаап каар дээннери ол.

Олар аажок сагышсырап кел чорааннар: чевег-куй аскында улуг дашты канчап чайладып алырыл? Иисусту орнукшуткан чевег-­куйлуг сесерликке чедип келгеннер. Чүү болганы ол? Дашты чайладып каан, чевег-­куйже орук ажык! Херээженнер чоокшулап келген. Кым-даа чок. Оваарымчалыг көрдүнүп, куйже бакылап көргеннер. Иисусту чыттырып каан даш олут куруг! Чүү болганы ол? Иисустуң мөчүзүн оорлай бергени ол бе?

Ол үеде Иисус катап дирилген, ынчангаш Ооң мага-боду чевег-­куйда чок болганы ол-дур деп олар билбээннер.

Даң адып турда кайгамчыктыг чүве болган: Христос дирилген! Чайынналдыр чырып турар Ангел дээрден дүжүп келгеш, келген кижи бүрүзү Ооң мында чогун бүзүреп көрзүн дээш, куй аксында дашты чайладып каапкан. Чевег куйнуң таңныылдары корткаш дезипкеннер.

А ол херээженнер ону билбээни ол. Олар шупту ээн чевег-­куйну көргеннер, ону көргеш Магдалина Мария аажок муңгараан. Ол өскелери чүнү канчаарын бодап четтикпээнде-ле дораан Петр биле Иоаннга чүү болганын медээлээр дээш маңнапкан. А арткан ийизи хенертен кылагар ак хептиг Ангелди көрүп кааннар. Херээженнерге ол өөрүнчүг медээни дыңнаткан:

— Иисус дириг! Кортпаңар! Дүрген чоруткаш, Ооң өөреникчилеринге барып чугаалаңар: Иисус катап дирилген!