Христосту херип-шаажылааны

Рим шериг отряды херип өлүртүр шииткел алган ийи дээрбечи-биле кады Иисусту иткилеп, кымчылап сүрүп чораан. Римчилерниң херектээннер херип турган черинче оларның соондан хөй чон база эдерип чораан. Ол черни Голгофа азы “хавак кыры” деп адаар. Хердирип өлүртүр кижи эриидеттирген соонда, хердирер белдир ыяжын ол черге чедир боду чүъктеп чедирер ужурлуг. Ынчангаш Иисус аар ыяш крести Боду чүъктеп чораан.

Орук ортузу чедип чорааш, ооң күжү шуут төнген. Киринея чурттуг Симон дээр кижиге отряд даргазы Иисустуң крестизин чүъктедип каан. Иисустуң соондан чоруп орган улус аразында Ооң бергедеп чоруурун көргеш ыглашкан херээженнер база хөй.

Шииткел кылыр черге келгеш, шериглер черде крестке Иисусту чыттыргаш, кадаглар-биле Ону крестке чыпшыр шаап, дерзии ажылын кылгаш, оңгар каскаш крести аңаа тургускаш, быжыглап алганнар. Арткан ийи шииттирген улузун база ынчалдыр хере шапкаш, оларны херген крестерни Иисустуң оң база солагай талаларынга тургузуп кааннар.

Иисусту өлүрүп шаажылаан черинге Ооң чоок эштери база келген — эр, херээжен каш кижи. Херээженнер ыглажып турган. А элээн ырадыр туруп алган бөлүк кижи Иисусту кочулап турганнар:

— Бодуңга Бодуң дузала! Бурганның Оглу шын болзуңза, белдир-­ыяштан дүжүп кел! Ынчан Сеңээ бүзүрээр бис!

Херектээннерниң бирээзи Иисусту куду көрүп, сөглеп, а өскези аңаа:

— Сокса! Бистиң шииттиргенивис чөптүг болгай, үүлгеткен херээвистиң кем-буруузу ол хире-дир, а Ол багай чүнү-даа кылбаан — дээш, оон ол Иисуска мынча дээн:

— Дээрги, Бодуң Чагыргаңга келгеш, мени база сактып кээп көрем.

Иисус аңаа мынча деп харыылаан:

— Аазап тур мен: бөгүн-не Мээң-биле кады дываажаңга турар сен!

Ооң соонда хенертен чер кырын дүмбей караңгы шыва апкан, чер сирилей берген.

Шыдажыр арга чок аарыгны Ооң чүгле мага-боду эртер ужурлуг эвес, а чүден артык сагыш-­сеткилдиң хөрек долу кызаашкыны Аңаа оон-даа берге болуп турар. Кажан-даа бачыт кылып көрбээн Иисусче бүгү делегейниң бачыттары чүдүрлү берген. Бижиир дээрге сөс чедишпес хилинчектиг элээн шактар эрткенде кагдырыпкан чааскаанзыралындан Иисус чаннып эгелээн:

— Мээң Бурганым, Мээң Бурганым, чүү дээш Мени кааптың?

Бүгү делегейниң кижилериниң кылган бачыттары дээш, Дээрде Адазының кымның-даа ууп шыдавас килеңи Ооң кырынче чүдүрүлгенин Ол билген. Ону чүгле Христос Бурган база Кижи эртип шыдаар.

Караңгы дүмбей эрте бээрге Иисус Бодунуң сөөлгү сөзүн чугаалаан:

— Болу берди! Ачай! Амы-тынымны Сээң холуңга хүлээдип тур мен.

Ону чугаалаан соонда амы-тыны үстү бергеш, бажы халая берген. Иисус өлү берген.

Ол-ла кежээ бай, ат-сураглыг, Аримафея чурттуг Иисуска ынак, ынчалза-даа корткаш ону улустан чажырып турган, Иосиф дээр кижи Пилатка келгеш, Иисустуң мөчүзүн крестен дүжүргеш, иудей ёзузу-биле орнукшудуп каар чөпшээрел дилеп алган. Рим чагырыкчы чөпшээрээн.

Дээргиге бир дүне кээп ужурашкан соондан бээр Христостуң чажыт өөреникчизи апарган Никодим база Иосифке дузалап турган. Иудейлерге кижи орнукшударда чүү херек турганыл, ол шуптузун эккелген: орнукшудар кижини ораап каар ак пөс шывыг, чаагай чыттыг смирна, алоэ. Иисустуң мага-бодун шывыг-биле шевергин ораагаш, чаагай чыттыг бальзам-биле чаап каан. Ооң соонда ол черден ырак эвесте хаяда оюп каан чаа чевег-­куйга салып кааннар. Чевег-куйнуң кирер аксын улуг даш-биле дуглап каан, а дашты тускай оруктай казып каан чер-биле чууктап эккээр чүве-дир. Оон бажыңнарынче чанып келгеннер.

Эртенинде бараалгакчылар баштыңчылары база фарисейлер Иисустуң үшкү хүнде дирлип кээр мен деп турганын сактып келгеннер. Пилатка келгеш Иисустуң чевег-куюн кадарар таңныылдар дилээн. Өөреничилери Иисустуң мөчүзүн оорлап алгаш, Ол катап дирли берди дей бээр деп бодааш, кортканнар. Чевег-куйну кадарар шериглерни Пилат берген. Оон артык, чевег-­куйже кижи кирбезин дээш, иудейлер аңаа таңмазын базып кааннар. Баштыңчылар ынчалдыр өлүг Иисусту кадарып турган, чүге дизе кортканнар.