Иисус Пилаттың мурнунда

Эртенинде шериглер Иисусту Рим империязының төлээлекчизи Пилатка эккелген. Иисусту өлүрүп шаажылаар, шаажылавазының дугайында шиитпирни ол үндүрер ужурлуг. Ооң хүрээлеңин долдур мөөң кижи чыглып келген. Чыылган чонга Пилат ыыткыр чарлаан:

— Бо Кижини өлүрүп шаажылаар кандыг-даа буруузун көрбейн тур мен. Ынчангаш эриидеп кезеткеш, ону салып чорудар дужаал бээр мен.

— Чок, чок! — деп, чыылган чон алгыржып үнген. — Хере шаап каг! Ону хере шаап каг!

Ынчалза-даа Ооң буруу чогун Пилат эки билип турган. Ынчан ооң бажынга мындыг бодал кирип келген: “Пасха байырлалында иудейлерниң бир хоругдаттырган кижизинге хосталга бээр чаңчылы бар. Бир эвес мен оларга Варавва аза Иисустуң кайы бирээзин шилип аарын сүмелезимзе, Иисусту-ла шилип алыр боор”. Ынчангаш Пилат оларга:

— Мен бо чылын силерге кымны хостап берейн? Варавваны бе азы Иисусту бе? — деп айтырарга, олары:

— Варавваны, Варавваны, Варавваны! — деп алгырышканнар.

Оларның алгызы өргээниң хүрээлең девискээринге дыңналып турган. Ында шериглер Иисусту дорамчылап, шаажылап, оозундан чалгаа чазып, таалал ап турганнар. Иисусту дерзии эриидээн санында-ла дорамчылап, каттыржыр болганнар. Хаанның хүрең-­кызыл хевин кедиргеш, тенниг харагандан оваадай өрүп алгаш бажынга кедиргеш, ханын төгүлдүр кымчылап, дорамчылап мага ханып, алгыржып турган:

— Иудеяның хааны, амыра!

Иисусту мага хандыр эриидеп дорамчылап алган соонда, Ооң ыыт чок чөпшүлүн көргеш, чон ону кээргей бээр боор деп идегээш, Пилат оларның баарынга Иисусту үндүрүп эккелген. Кым-даа Аңаа кээргелин илеретпээн, а харын-даа:

— Ону хере шаап каг! Хере шаап каг!

Пилат Иисусту хостап үндүрүптерин кызыдып чадашкаш, суг алдыртып алгаш, чон мурнунга холдарын чуггаш чугаалаан:

— Шынның бо Кижизиниң төктүр ханы дээш, мен буруу чок мен. Мен Ону хере шавар дужаал бээримге, а буруузу силерниң кырыңарда!

Ооң соонде Пилат Варавваны хостаар айтыышкын берген. А Рим шериглер Иисусту дорамчылаарын улаштырган.