Петрның ойталааны

Пятница. Даң адар чоокшулап турар. Иисусту дээди бараалгакчы Каифага чедире берген. Ооң бажыңында синедрион (Дээди иудей чөвүлел) кежигүннери Иисусту байысаап, шииткел үндүрер дээш чыглып келген.

Петр Башкызының соондан ырак эвеске эдерип чорааш, Иисусту байысаап турар херим иштинче аргалап тургаш кирип келген. Шериглер база чалчалар соогунга херим иштинге от салгаш, долгандыр чыннып олуруп алырга, Пётр база оларның аразынга олуруп алган.

— Сен база ол Иисустуң өөреникчизи ийик сен бе, ындыг але? — деп, хенертен бир чалча херээжен аңаа чугаалаан.

— Чок, чок — деп Петр шынзыктырган.

Чоокта чаа-ла кажан-даа ынчанмас мен деп турган хирезинде, Петр ынчалдыр бир дугаар Иисустан ойталаан.

Ооң соонда шак хире эрткенде Петр херим иштинге база катап одаг чанынга келген. Башкызын шиидип турар үеде чүү болуп турарын ол шуптузун көрүп, билип турган. Мөөң чон аразынга чаштынып алгаш, ол синедрион чөвүлелин кажан доостурун манап турда, чалчаларның бирээзи Петрче көргеш:

— Сен база Ооң-биле турган сен! — дээн.

— Иисус-биле? Мен Ону шуут танывас мен!

Ол ынчалдыр ийи катап Дээргиден ойталааны ол.

Ол үеде суд залындан коргунчуг шимээн үнген. Иисусту иткилеп, кочулап, дорамчылап, а чамдыктары эттеп-соп турганнар.

Ол өйде база катап бир кижи Петрга чугаалаан:

— Сен ылап-ла оларның бирээзи-дир сен. Чугааң аяны херечилеп тур!

А Пётр Башкызын кайы хире дерзии эттеп турарын көргеш, боду база эттетпес дээш, чугаалаан:

— Ол Иисусту билбес мен!

Ол өйде аскыр дагаа чаа хүннү дыңнадып, эде берген.

Ынчан ол дүүн кежээ Пасханың кежээки чем үезинде Иисустуң “Бөгүн, аскыр-­дагаа алгырар бетинде, сен Менден үш катап ойталаар-дыр сен» — дээнин сактып келген. Оон ойталап турар Дээргизинче Пётр көрнүп кээрге, ол өйде Башкызы база олче көрүп турар болган.

Ыяткан база ханы кажыыдаанынга алзыпкан Пётр мөөредир ыглай бергеш, дүрген-не ол черден ырадыр маңнапкан. Башкызының ол көрүжүн Пётр бүгү назынында сактып алган.