Иисусту тудуп хоругдааны

Сесерлик чанынга мөөң чон чыглып келген. Олар кыпсып алган факелдери-биле оруун чырыдып, дээрбечи кижи тудуп хоругдаарынга бир дөмей, чыда, селеме-биле чепсегленип алган чоокшулап келген. Оларның көвей кезии Бурган бараалгакчыларының база фарисейлерниң чалчалары. А өөреничилерниң бирээзи Иуда оларны эдертип эккелген.

— Кымны дилеп чор силер? — деп, Иисус айтырган.

— Назарет чурттуг Иисусту — дээн үн оларның аразындан дыңналган.

— Мен-дир мен.

Иисусту тудуп алыр дээн улус-биле Иуда баш удур дугуржуп алган чүве-дир: “Будулгаазын болбазы-биле мен демдек кылдыр Башкыны мендилеп ошкап каар мен. Ол кымны тудуп, хоругдаарының демдээ болур, оон билип каар силер”.

Иуда Аңаа чоокшулап келген. Иисус аңаа оожум:

— Мени ошкаашкын-биле садарың ол бе? — деп айтырыг салган.

Иуда сактырга ол Сөстер чүрээнче кадапкан ышкаш болган болза-даа, Дээргини ол дөмей ошкап каан. Ол-ла дораан Бурган бараалгакчыларының чалчалары Иисусту тудуп алганнар.

— Силер чүге Мени мында дүмбей дүне тудуп алдыңар? Мен хүннүң-не силер-биле кады Бурганның өргээзинге турдум, ынчан силер Меңээ хол дегбээн болгай силер — деп чугаалаш, Ону тудуп алырынга удурланмаан.

Өөреникчилери Башкызын тудуп бар чыдарын көргеш, корткаш тарадыр маңнажы бергеннер.

Дайзыннарынга бүзээлеткен Иисусту Иерусалимче апарган. Ында Иисусту өлүм шииткели манап турар.