Гефсиман садынга

Иисус он бир өөреникчилери-биле Иерусалим кыдыында агып чыдар Кедрон хемни кеже берген. Оларның аразында он ийи дугаары Иуда чок. Дүн караңгызында олар Елеон даанда Иисустуң Адазынга тейлээр черинче чорупканнар.

Даг эдээнде Гефсиман дээр сесерлик бар. Олче кирер черге келгеш, Иисус өөреникчилеринге чугаалаан:

— Маңаа манаңар, а Мен барып тейлээйн.

А Петрну, Иаковту база Иоанны Ооң-биле чоруурун дилээн.

Ол минуталар Иисуска дыка берге болуп турар, чүге дээрге Ол дыка ханы кажыыдап, муңгарап турган. Ону чүү манап турарын Дээрги билир. Кижи төрелгеттенниң шупту бачыттары Аңаа чүдүрлуп келген, а Иисус ол өлүмнүг хилинчекке уткуштур крестче бар чыдар. Шыдажыр арга чок аарыгны Ооң чүгле мага-боду эрттер ужурлуг эвес, а чүден артык Ол сагыш-­сеткилдиң хөрек долу кызаашкыны оон-даа берге болуп турар. Кажан-даа бачыт кылып көрбээн Иисус шупту кижи төрелгеттенниң бачыттарын чүктээр ужурлуг.

Ханы кажыыдалдан муңгараан Дээрги Бодунуң ынак өөреникчилерин дилээн:

— Хөрек-чүрээм сыңышпастап тур, Мээң чанымга удувайн кады туруңарам!

Кандыг-даа кижи эш-өөрүнден деткимче манаар болгаш, Дээрги Иисус база Бодунуң эш-өөрүнүң Ооң-биле кады тейлээр деткимчезин хереглээн. Олардан каш базым ырай бергеш, дискектеринге олурупкаш, мөгейип чалбарган:

— Ачай, Сээң күзел-­сорууң ындыг болза, хилинчектиң бо дашказын Менден чайлады берем. Ындыг-даа болза, бүгү чүве Мээң эвес, а Сээң күзел-­сорууң ёзугаар болзун!

Кандыг-даа кижи халаптыг хилинчектен чайлап чоруурун күзээр болгаш, Дээрги Иисус база кел чыдар берге хилинчектен чайлай бериксээн, ынчалза-даа Ол Адазының дыңнаңгыр Оглу болгаш мынча дээни ол:

— Мээң эвес, а Сээң күзел-­сорууң ёзугаар болзун!

Иисус аар-бергезинден база чүрээниң ханызындан чалбарып турганындан Ооң ханныг дери черже дамдылап турган. Дээрден Ангел чедип келгеш Ону быжыктыра берген.

Иисус сөгүрүп тейлээн соонда, демги кады тейлээрин дилээни үш өөреникчизинге кээрге, олар тейлевейн удуй берген болганнар. Оларны оттурупкаш Петрга чугаалаан:

— Симон! Удуй бердиң бе? Мээң-биле бир шак удувайн барып шыдавас болдуң бе?

Иисус Симон Петрнуң ооң мурнунда кажан-даа Иисустан ойталавас, харын-даа Ооң-биле кады өлүрүнге беленин аазап турганын сагындырар бодааны ол. Өөреникчилерин Ону деткиирин ооң соонда база ийи катап дилээн, база ийи катап дедир келирге-ле олар удаан болур. Үшкү удаа оларже дедир чедип келгеш, Иисус мынча дээн:

— Силер ам-даа удуп дыштанмышаан силер бе? Мээң шагым келди: Кижи амытан Оглун бачыттыглар холунга тудуп берип турар-дыр. Тургулаңар, чоруулуңар. Мени садыпкан кижи чоокшулап келди!