Сөөлгү Пасха

Израиль чонунуң чугула уткалыг байырлалы — Пасха. Бо удаада Иисус ону өөреникчилери-биле эрттириксээн.

— Иерусалим баар орукка доңгада суг көдүрүп алган кижиге таваржы бээр силер –деп Петр биле Иоаннга Ол чугаалаан. — Ооң соондан кире бергеш, каяа Пасха байырлап болурувусту айтырыңар. Ол силерге улуг өрээл айтып бээр, Пасханы аңаа белеткеп болур силер.

Иисустуң чугаалааны ёзугаар өөреникчилери шуптузун белеткеп алган.

Кежээ олар улуг өрээлге чыглып келгеннер. Ынчан Иисус байырлал чаңчыл-­ёзузунга хамаарышпас чүве кылган. Ол чунар саваже суг кудуп алгаш, бир өөреникчизиниң баарынга дискекке олуруп алгаш, ооң буттарын чуп эгелээн. Бир кижиниң будун чуп бергеш, дараазында өөреникчизиниң, база дараазындаазының…

Өөреникчилер карактарын хере көрүп алган, кайгап турганнар. Ол чүү уткалыг болганы ол? Бай улустар аалчыларның будун чуур чалчалыг боор, а Иисус оларның чалчазы эвес-ле болгай! Ол оларның Башкызы, Бурганның Оглу! А Ол чалча кижи кылыр ажыл кылып турар!

Ээлчег Петрга кээрге, ол удурланып үнген:

— Дээрги, мээң буттарымны кажан-даа чугбас силер!

Иисус олче көргеш чугаалаан:

— Буттарың чугдурбас болзуңза, Меңээ хамааржып шыдавас сен.

Петр боданган. Чугаа бут хири чуурунуң дугайында чорбайн турар, а Иисус мында улуг утка сиңирген.

Шуптузунуң буттарын чуп дооскаш, Иисус оларның-биле кожа ийленип олуруп алган.

— Силерге Мээң чүнү кылганымны билип тур силер бе?

Өөреникчилери ыыт чок, чүге дээрге ооң утказын билбейн барганнар.

— Мен силерге чижек көргүстүм, силер база бот-боттарыңарга ынчаар

кылып чоруңар.

“База ынчаар кылыр? Чалча болур бе? Иисус бистен ынчаар кылырын таанда, албадап шыдавас-ла ыйнан? — деп бодааннар.

Иисус уламчылаан:

— Силер Мени Башкы болгаш Дээрги деп адаар-дыр силер, ынча дээриңер шын — Мен ылап-ла ындыг мен. Ынчангаш Дээргиңер болгаш Башкыңар болур Мен силерниң буттарыңар чуп берип турумда, силер база бот-боттарыңарга база ынчаар кылып чоруур ужурлуг силер.

Ам кежээки чемни эгелеп болур. Өөреникчилер чемни салыпкаш, Иисустуң тейлээрин манап олурганнар. А тейлээриниң мурнунда, Иисус Бодунуң өлүмүнүң дугайында сагындыргаш, база катап оларны кайгаткан.

— Мени кочулап катыржырлар. Мен эриидедип, өлүртүр мен. Ынчалза-даа үшкү хүнүнде өлүглерден катап дирлир мен — дээн сөстер өөреникчилерни дыка муңгараткан.

А Дээрги улаштырган:

— Мен силерниң-биле хилинчек көөрүм мурнунда, бо Пасха байырлалын силерниң-биле дыка эрттирикседим, чүге дээрге дараазында Ону мен өске делегейге, Бурганның Чагыргазынга эрттирер мен.

Ооң соонда Иисус хлебти алгаш, ол дээш четтиргенин илередип тейлээш, ону кезектерге үзе тырткылааш, өөреникчилеринге үлеп берген.

— Бо дээрге силер дээш берип турарым Мээң мага-бодум-дур — деп Ол чугаалаан. — Мону Меңээ тураскаал кылдыр ынчаар кылып чоруңар.

Чем соонда дашканы алгаш, аңаа виноград арагазын куткаш, чугаалаан:

— Бо дашка дээрге силер дээш төгерим Мээң Ханым-дыр. Ол силерниң-биле чарар Чаа Чагыг-керээ-дир — дээш, дашканы чанында олурган өөреникчизинге сунарга, олар шупту ээлчег-биле ол дашкадан ишкеннер.

Кежээки чем төнчүлеп турган. Бо Пасха байырлалы мурнуку чылдарныындан шуут өске болган. Өөреникчилер ооң чүгле эвээш кезиин билгеннер. Ынчалза-даа үр болбайн Дээрги Иисустуң сөөлгү Пасха байырлал кежээзинде оларга чугаалаан чагыының утказын биле бээрлер.