Вифанияга Иисусту орнукшударынга белеткээни

Пасхага чедир алды хонук артканда, Иисус Бодунуң өөреничилери-биле Вифанияга келген. Ол база-ла Марфа, Мария база Лазарьның бажыңынга доктаап алган. Даартазында кежээ олар шупту мурнунда кеш аарыындан экиртип кааны Симоннуң бажыңынга келгеннер. Марфа аалчыларын шайладып турда Мария тургаш, арыг нардтан (үнүш ады) кылган улуг үнелиг, чаагай чыттыг үс долу доңганы алгаш, аксын оваарымчалыг ажыткаш, Иисустуң бажындан буттарынче үстү кудупкан. Ооң соонда узун чажын часкаш, ооң-биле Иисустуң буттарын чодуп берген. Бажың ишти чаагай чыттыг үстен айдызалы берген.

Улуг өртектиг үстү ынчаар чарыгдаары харамнанчыг болган болгаш, олурган улустуң чамдыызы Марияга хорадап турганнар. Сөөлүнде Иисусту садыпкан Иуда Искариот ынчан:

— Чүге бо чаагай чыттыг үстү үш чүс мөңгүн чооска садыпкаш, акшазын ядыыларга үлеп берип болбас турганыл? — дээн.

Ону Иуда ядыылар дээш сагыш салгаш эвес, а ооржу болган ужурунда чугаалап турган чүве-дир: ол ниити акша шыгжаар хааржакты бодунга ап чораан болгаш, Иисуска берген өргүл акшаны бодунуң хереглели дээш уштуп алыр чаңныг турган кижи-дир.

Дээрги өөреничилерин соксадып чугаалаан:

— Ол Меңээ эки чүве кылып турар кижи-дир. Ядыылар силерниң-биле үргүлчү кады турар болгай, а Мен үргүлчү кады турбас мен! Ол Мээң мага-бодумну үс-биле чаап, баш удур орнукшударынга белеткеп кагды! Делегейниң бүгү булуңнарынга Евангелие тараткан чер бүрүзүнге Меңээ ооң чүнү кылганын сактып чугаалажыр!